Søren Eriksen atorfinissimavoq

DSB-imi pisortaasimasoq oqallissutaasoq Tele Greenlandimilu pisortatut atorfinitsinneqarnissani sioqqulugu tunuartoq, Søren Eriksen, suliffeqarfinni aningaasalersuisartumi pilersinneqaqqammersumi SE Blue Equity-mi pisortanngussaaq. Naalagaaffiup qimuttuitsoqarnermut suliffeqarfissuani DSB-mi pisortaasimasup Danmarkimi aviisimut Jylland-Postenimut tamanna uppernarsarpaa.
Allattoq Knud Reimer
aggustip 11-at 2012 16:19

DSB-miit siorna soraarsiaareerluni, Søren Tele Greenlandimi pisortatut upernaaq atorfinikkaluarpoq, juulillu aallaqqataani sulilertussaagaluarluni. Kisianni nammineq oqarneratut "angerlarsimaffimmi pissutsinik peqquteqartumik", taamani piffissakkut kingullikkut tunuarpoq.

Qaammatip aappaata affaa qaangiutiinnartoq, SE Blue Equitymi, Esbjergi-imiittumi pisortanngornissamut sooq piareersimanersoq, Jyllands-Posten, aperimmat, Søren Eriksen akiumanngilaq.

Søren Eriksenip nutaamik atorfinissimanera tusaannavillugu, Tele Greenlandip siulersuisuini siulittaasoq, Agner N. Mark, oqaaseqarumanngilaq.

- Aviisimi tamanna atuannginerani ilisimatinneqannginnama, soorunami tupappunga. Søren Eriksenili isumaqatigiissuteqarfigiunnaareeratsigu, pituttugaanani allami sulilersinnaavoq, Agner N. Mark, oqarpoq.
Taanna amma oqaluttuarpoq, Tele Greenlandip sulisussarsiuussisartua, Russell Reynolds, suliffeqarfimmi pisortaasinnaasumik maanna ujarlileruttortoq.

- Isumaqatigiissuterpullu malillugu akeqanngitsumik taamaliorput. Pisortassatummi piukkussarput arlaannik pequteqartumik atorfininngikkaangat, tamanna ileqquuvoq, Agner N. Mark  oqarpoq ilassutigalugulu, biilit Telep pisortanngortussamut inniminnikkani, sussaaginnarsimagai, illuli Søren Eriksenimut pisiaq Telep suli pigigaa.

- Sulisunut Nuummi 100-ngajannik inissiaateqareeerpugut, illulu taanna attartortussarsissavarput -  immaqa pisortaalersussamut. Qaammatimmi marlussuit qangiuppata atorfinitsitsinissarput naatsorsuutigaarput, Tele Greenlandip siulersuisuini siulittaasoq oqarpoq.