Søren Brandt: Landskarsi ajugaavoq, aalisartut susaarput

Aalisarneq pillugu EU-mut isumaqatigiissut unnuaq sisamanut Ilulissani atsiorneqartoq Kalaallit Nunaanni Sulisitsisut Peqatigiiffiata aalisarnermut immikkoortortaqarfianit iluarineqanngilaq, aalisartut eqqarsaatiginerunagit landskarsi eqqarsaatigineqarnerusimammat.

-Isumaga malillugu landskarsi ajugaavoq kalaallit aalisartortai ajorsartut. Ukiorpassuarni eqqartorneqarnikuusut EU-p pisassai aalisagarpassuarnik imaqartoq, soorlu suluppaakkat pisarineqarsinnaanngitsut naluneqanngitsoq, massakkut taarserneqarput ilumut qaqinneqarsinnaasunik. Neriuutigigaluarparput kalaallit aalisartuinut tussasut, kisianni tassa massakkut EU-mut tutsinneqarput, taannalu assut uggornarpoq, Søren Brandt isumaqatigiissummut nutaamut pakatsisimaqisoq oqarpoq.

Aalisarnermut isumaqatigiissut nunatsinnut ukiumut 318 millioni koruuninik isertitsissutaassaaq – massakkut isumaqatigiissut assigiinnangajallugu. Isumaqatigiissutip nutaap assigiinngissutigivaa aningaasat EU-mit pissarsiarineqartartut marlunnut avinneqarmata, 186 millioni koruunillu landskarsimut tuttalissammata ineriartortitsinermut atugassatut taaneqarlutik.

Aalisarnermut isumaqatigiissutip EU suluppaakkanut pisassai annikillisingaatsiarpai. Imminnguit piivinneqarsimapput, qalerallillu tunumi annikillisinneqaraluartut kitaani 1.000 tonsinik pisassinneqarput, saattuartassallu affaannanngortinneqarlutik. Isumaqatigiissummi allaqqavoq pisassat akillu ukiumoortumik iluarsiiffigineqartarnissaannut periarfissaqartoq. Søren Brandt isumaqarpoq isumaqatigiissut nunatsinni aalisartunut kingunipiloqassanngikkaluartoq ingerlariaqqinnissaannut killiliisoq.

-Isumaqatigiissut aalisartunut kinguneqarujussuanngilaq, kisianni alloriaqqiffissaq ungasilleqqiinnarpoq. Utaqqisariaqassaagut pisoqaqqinnissaanut. Landskarsi uterfigeqqissagukku isumaqarpunga assorujussuaq piffissaq kingulleq eqqartorneqaqattaarsimasoq, uffalu aatsaat taama oriuteqalertigisoq, tassami 2 milliardit tungaanut ooriuteqarput. Isumaqarpungalu taakku atorneqarpallaanngitsut. Siunissaq eqqarsaatigalugu periarfissaq massakkut tigusimasuugunikku aajunatsiaagaluarpoq. Annaagallarparput, utaqqisariaqarpugunaasiit, Søren Brandt oqarpoq.