Atassutip 1983-imili KANUKOKA-mi siulittaasuutitaqarsimanani – maanna siulittaasuutitaqaqqilernera siulittaasunngortup nuannaarutigaa, naallu kommunit 18-it aappaagu sisamaannanngorlugit kommunerujussuanngortinnissaat ulapputaagaluartoq, siulittaasutut suliassani merserinagu, Søren Alaufesen oqarpoq.
Kalaallit Nunaanni Kommuneqarfiit Kattuffianni KANUKOKA-mi siulittaasunngortoq Sisimiut kommuneani suliffissarsiorsiuussisarfimmi ukiut 16-issaa siunnersorti, 39-inik ukiulik, Søren Alaufesen, aperaarput qanga politikkimik soqutiginnilersimanersoq:
- Meeraallungali politikki soqutigiuarpara, taamanimiilli inuiaqatigiinni malinnaajuarneq ingerlassimallugu. Oqarsinnaavunga aamma inunnguuseralugu Atassutaallunga, tassa ilaasortaanermut killissarititaasoq angugakkuli ilaasortanngorpunga. Oqarpoq nangillunilu.
- Atassutip nuna tamakkerlugu siulersuisuini ilaasortaanikuuvunga, 1993-imiit 2003-p tungaanut. Qineqqusaaqqaarpunga 27-iinnarnik ukioqarlunga, 2005-imiillu Sisimiut Kommunalbestyrelseanut iserlunga. Siulianili 1997-imi sinniisussaanini aallaavigalugu kommunalbestyrelsemi sulisareerpoq.
Soormitaavami KANUKOKA-mi siulittaasunngorpa?
- Nuna tamakkerlugu Siumut amerlanerussuteqarpoq kommunini inissisimatitaasuni taamaattumik naatsosrsuutigisimavarput unammillerutsigu kisitsinerput malillugu naligiissalluta, taamaasippat makitsinikkut siulittaasussamik toqqaaneq ingerlanneqassammat. Kisianni tassa qinersinerup takutippaa 11-10-mik inissittoqarnera.
KANUKOKA allaffissua qaninnerussagakku Nuummut nuuttussanngorpit?
- Siulersuisunngortut ataatsimiimmata inissitsiterlutik isumaqatigiissutigaarput sapaatip-akunnerata tulliata ingerlanerani Nuummukassalluta, tassanilu Nuummut nuunnissaq inissittariaqassallugu.
Siulittaasunngornerit qanoq igaajuk?
- Merserisimasuugaluarukku qinigassanngortissimanavianngikkaluarpunga, kisianni merserinngitsutut misigisimagakku akisussaaffik taanna tiguara. Ilumoorpoq kommunerujussuanngortitsinissamut piareersaatit annertupput aamma inissitassaqarpoq aalajangiiffigisap killiliussaasoq qaangiutsinnagu.
Aallartitat assigiinngitsunik KANUKOKA-p ataatsimeersuarnera oqariartuuteqarput.
- Taakku siulersuisut juunip aallartilaarnera ataatsimiinnissaanni eqqartussavaat taavalu tulleriiaarlugit inissittariaqassallugit. Søren Alaufesen Kangaatsiap nunaqarfiani inuerunnikumi Aqisserniani inunngortoq taama oqarpoq.
Søren Alaufesenip sunngiffimmini peqatigiiffilerineq soqutigisaraa, soorlu timersoqatigiiffimmi SAK-mi siulittaasuuvoq Sisimiullu Tusataani siulersuisuini ilaasortaalluni.
KANUKOKA-p siulersuisuuneri tamarmik ippassaq tunuarmata, siulittaasussatut Atassutip sassartippaa Sisimiuneersoq, Søren Alaufesen Siumullu sassartillugu Narsami borgmesteri Kiista P. Isaksen. Søren Alaufesen taasisinnaasunit 11-nit taaneqarpoq, Kiista P. Isaksen qulinit taaneqartoq.
Siulersuisunut ilaasortanngorput Apollo Mathiassen, Uummannaq, Kista P. Isaksen, Narsaq, Karl Lyberth Maniitsoq, kiisalu Ove Karl Berthelsen, Nuuk.
