Søren Alaufesen siulittaasunngorusuppoq

Atassut nuna tamakkerlugu aqaguagu sisamanngorpamiit aallartittumik ataatsimeersualerpat siulittaasussarsiortoqassaaq. KANUKOKA-mi siulittaasoq, Søren Alaufesen, ullumi nalunaarpoq, Atassutip maanna siulittaasua, Naalakkersuisunut ilaasortaq, Finn Karlsen, unammillerlugu siulittaasussatut qinigassangortinniarluni.
aggustip 26-at 2008 17:03

Atassutip siulittaasuisa aqutsinerannik naammaginninnginnermik tamanna pissuteqarnersoq aperigatsinni, Søren Alaufesen ima akivoq:

-Aap naaggalu. Siulittaasutut sassaqqullunga arlalinnit kaammattorneqartarsimavunga, tamannalu eqqarsaatigilluareerlugu aalajangerpunga taamaaliorniarlunga.

Søren Alaufesen 40-nik ukioqarpoq, Sisimiormiuuvoq, Kalaallit Nunaannilu Kommunit Kattuffianni, KANUKOKA-mi siorna 2007-imi upernaakkut siulittaasunngorpoq.

Atassutip qitiusumik allaffeqarfianiit ilisimatitsissutigineqarpoq, siulittaasussarsiornissami, Søren Alaufesenip saniatigut, Emilie Olsen Finn Karlsenimut unammillerluni sassaqqullugu aamma kaammattorneqarsimasoq.

Atassutip nuna tamakkerlugu sisamanngorpamiit ataatsimeersuarnissaata saniatigut partii ukiunik 30-nngortorsiorluni arfininngorpat aamma nalliuttorsiussaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq