Södertälje qimarngusorpassuarnit nutserfigineqarpoq

Washington Postimi ippassaq allaserineqarpoq Iranimiup biilitoqqaminik eqqissilluni Södertäljemi, Bagdadiaqqamik taagukkami, qaartartut aarleriginagit ingerlaarujoornera. Sumi tamaniit tusagassiuutit piffissami kingullermi Södertäljemut ilanngutassioriartortarput, qimaasorpassuarnik inoqarnera qanoq sunniuteqarnersoq alapernaallugu. Södertälje 80.000-it missaanni inoqarpoq taakkunanngalu 6.000-it missaaniittut Irakimiuupput, amerlanerit kristumiuullutik. Södertäljemi najugaqartut 40 procentii nunami allami inunngorsimanngikkunik nunami allaminngaanneersunik angajoqqaaqarput. Kommunimi meeqqeriviit atuarfiillu ulikkaarput, inissiat suliffissallu amigaataallutik. Borgmesteri, Anders Larvo qimaasunik nuuttoqartarnera oqaluttuariartorlugu Washingtonimeeqqammivoq.

- Uagut Irakimi sorsunneq aallartinngilarput, inuilli attorneqartut qimaaffissaqarnissaat akisussaaqataaffigaarput, Anders Larvo ilaatigut taama oqarpoq.

Qimaasut 20.000-it missaaniittut Sverigimi siorna nunasipput, assersuutigalugu 2001-imili sorsunneq aallartimmat inuit 5.000-it missaaniittut USA-mut qimaasimapput.