Syria akulerunniarpoq

Israelip Libanonimilu Hisbollah-kkut akornanni akerleriissuteqarnermi Israelip sakkutuui Libanonimut isertinneqassagaluarpata, Syriamullu qanillivallaarlutik, Syria akulerunniarpoq. Syriap paasissutissiinermik ministeria Mohsen Bilal taama oqarpoq.

- Israel Libanoni isaaffigissagaluaruniuk qanillivallaarlutalu, Syria isiginnaaginnarusunngilaq. Akulerukkumaarpugut, Mohsen Bilal Spaniamiut aviisiannut ABC-mut oqarpoq.

Akiuukkunnaarallarnissarli anguniarneqarnissaa sulissutigineqartariaqartoq, Mohsen Bilalip erseqqissaatigaa, parnaarussanillu paarlaasseqatigiittoqarsinnaanissaa siunnersuutigalugu.

Tamanna pillugu Spaniap nunanut allanut ministeria Miguel Angel Moratinos oqaloqatigisimagini Mohsen Bilalip oqaatigaa.

Taanna ulluni kingullerni Spaniap nunanut allanut ministeria Madridimi ataatsimeeqatigisimavaa.

Hisbollah-kkut Syriamiunit sakkussanik ikiorneqartarsimasutut USA-p pasilliinera Mohsen Bilalip akuersaarnartinngilaa.