Syfilisimik tunillanneqarsimasut nunatsinni amerliartortut

Syfilisi nunatsinni inuit akornanni ukiorpassuarni tuniluussimanngitsoq maanna tuniluutileruttorpoq.

Syfilisi nunatsinni inuit akornanni tuniluutilersimammat kikkulluunniit tunillanneqarsimasorisinnaasut misissortinnissaat kaammattuutigineqartoq, Sermitsiaq.AG allappoq.

Sisimiuni nunap immikkoortuani peqqinnissaqarfik kaammattuuteqartuuvoq.

Syfilisilu inoqarfinni ataasiakkaaniinnaanngitsuni nunatsinnili tamarmi inuit akornanni tuniluummat tamanna nunatsinnut tamarmut kaammattuutigineqartoq, nunatsinni nakorsaaneq Henrik L. Hansen Sermitsiaq.AG-imut oqarpoq.

- Nunatsinni syfilisimik tunillanneqarsimasut ukiualuit matuma siorna ikitsuararsuupput. Tunillanneqarsimasulli ukiuni kingullerni arfineq-marlunni amerliartorput. Tamannalu nunatsinni tamarmi atuuppoq, nakorsaaneq oqarpoq.

Syfilisimik usuup pooqarani atoqateqarnermi tunillatsittoqarsinnaavoq, tunilanneqarsimagaannilu annernanngitsunik mamitsuittunillu timikkut ammarterneqalissutaasinnaallunilu naajorartoorneqaataasinnaavoq.

Kinguaassiuutitigullu nappaammik taassuminnga tunillanneqarsimanermut nakorsaaserneqarsimanngikkaanni ilaatigut sianiutit ajoqusersinnaapput.

Nunatsinni inuit akornanni syfilisimik tunillanneqarsimasutut nalunaarsorneqarsimasut 2020-mi 140-pput. Taakku 47 procentii 15-it 24-llu akornanni ukioqarput.

Syfilisili kisimi tuniluutinngilaq, kinguaassiuutitigummi nappaatit allat soorlu klamydia gonorrélu inuusuttut akornanni aamma tuniluupput.

Nunatsinni 2019-imi inuusuttut akornanni klamydiamik tunillanneqarsimasutut nalunaarsorneqartut ullormut ikinnerpaamik marluusarput.

Aamma 2019-imi inuusuttut 13-it 19-illu akornanni ukiulinni ullormut ikinnerpaamik ataaseq gonorrémik tunillanneqarsimasutut nalunaarsorneqartarpoq.