Sydkorealu atsioqatigiittut
Naalakkersuisut siulittaasuata Kuupik Kleistip aamma Korea Kujalliup præsidentiata Lee Myung-Bakip Ilulissani ippassaq ataatsimeeqatigiinneranni, isumaqatigiissutinik assigiinngitsunik sisamanik atsioqatigiittoqarpoq.
Siulleq tassaalluni paaseqatigiilluni uppernarsaaqatigiissummik taaneqartoq, inuussutissarsiornermut aatsitassanullu Naalakkersuisup Ove Karl Berthelsenip aamma Korea Kujalliup Ilisimatusarnermut Aningaasarsiornemullu ministeriata Hong Suk-Woop atsioqatigiissutigisaat. Taakkua paaseqatigiillutik aatsitassarsiornermut tunngatillugu ilaatigut ilisimatusarnikkut paasissutisseeqatigiittarnikkullu suleqatigiinnerunissaq kissaatigaat.
Isumaqatigiissut inatsisitigut pisussaaffiliisuunngitsoq, ukiuni tulliuttuni pingasuni atuutissaaq.
Tamatuma saniatigut NunaMinerals aamma Korea Resources Corporation paaseqatigiillutik uppernarsaaqatigiinnermik atsioqatigiipput soorlu aamma GEUS - tassa Danmarkimi Kalaallit Nunaannilu ujarssiuutut misissuiffik - aamma Koreami ujarassiornermik ilisimatusarnermut aatsitassarsiornermillu ingerlatsivik atsioqatigiittut.
Aamma Aarhusimi Universiteti Koreamiut issittumik ilisimatusarnermut ingerlatsiviannik siunnerfeqaqatigiinnissamik atsioqatigiissuteqarpoq.
Isumaqatigiissuteqarnerit pillugit Kuupik Kleist ilaatigut ima oqarpoq:
- Nunarsuarmi suliffissuaqarnikkut siuarsimanerpaat ilaannik naalagaaffimmik attaveqalernermut annertuumik periarfissiisinnaasumik manna aallarniutaavoq, oqaluttuarisaanermut ilannguttussaq. Korea Kujallermit tikeraartoqarnerata naqissuserpaa Kalaallit Nunaata nunanut allanut attaveqarnerata suli sakkortuseriarnera.
