Sydfrikami ANC-mit anisut partiiliulerput

Sydafrikami partiimit nuimanerpaamit anisut immikkut partiiliornialerput. Partii qimataat tassaavoq African National Congress (ANC), Afrikami partiit pilersinneqartut siullersaat, 1912-imi pilersinneqartoq.
Allattoq Najaaraq Egede
oktobarip 19-at 2008 17:00

Partiimik nutaamik pilersitsiniarneq pillugu Sydafrikami illersornissamut ministeriusimasoq Mosiuoa Lekota, Sydafrikami radioqarfimmut taama nalunaarpoq.

- ANC avissaartuuffiuvoq, taamaammat aatsaat taama sunniuteqartigisumik partiimik ANC unammillerteqalissaaq, Lekota oqarpoq.

Partiimit ANC-mit anisut novembarip ulluisa aappaanni ataatsimiinnerminni partii nutaaq saqqummiutissavaat.

Nutaarsiassaq ilimagisaasimagaluarluni partiimi ANC-mi namminermi ilaasortat akornanni najummassimanartorsiortitsissagunavippoq, tassami partii qaqortumik qernertumillu amillit immikkoortitaanerat apartheitimik taaneqartartoq 1990-ikkunni atorunnaarsinneqarmalli ANC Sydafrikami naalakkersuinikkut siuttuusimavoq.

Aaqqiagiinngissutit aamma ilagissagunavippaat Afrikap aningaasaqarneranut politikkissaq.

Lekota, partiimik nutaamik aallartitsinialersaaramili ANC-mit anisitaasoq naalakkersuisoqatigiinnik sakkortuumik uparuaasareerpoq, politikkiat ajalusoortuarnerartarlugu siunissamullu isigisunik pilersaaruteqanngippallaarnerarlugu oqaaseqartarami.