Sydafrikamiut 20-it Maarmorilimmut tikisinneqassapput

Akuersissummik tuniussinissaq piviusunngortinneqassaaq aqagu ataatsip qeqqanut Hotel Uummannami.

Black Angel Mining Company-p, Angus & Ross-mit pigineqartup, ammarneqarnerani nunatsinni suliffiusinnaasut 85-nik ilassapput.

Kikkummi aatsitassarsiorfimmi sulisuussappat?

- Aallartisarnermi suliffeqarfiup naatsorsuutigaa sulisut 20-it missaannik amerlassusillit Sydafrikamiit nunanilu allaniit tikisissallugit, siunertaavorli sapinngisamik amerlanerpaanik nunatsinneersunik sulisoqalernissaq, tamannalu ukiut tamaasa angujartuaarneqassaaq, Aatsitassarsiornermut Pisortaqarfimmi pisortaq Jørn Skov Nielsen oqarpoq.

Soormiuna aamma Sydafrikamiit tikittoqassasoq?

- Afrikamiit tikisitsinissamut patsisaavoq Afrika aatsitassiorfippassuaqarmat qaarusunnilu sulisorpassuaqarfiulluni. Inatsimmi allassimavoq sapinngisamik nunatsinneersunik sulisoqassasoq – kisiannili innersuutassaqanngikkaangat avataaneersunik sulisoqartoqarsinnaasoq, imaluunniit immikkut piginnaanilinnik maani peqanngikkaangatta.

Aatsitassaqarnermut pisortaqarfimmi pisortap Jørn Skov Nielsenip erseqqissaatigaattaaq aatsitassarsiorfimmi atortussat sakkussallu Afrikameersuunerat pissutigalugu taamak amerlatigisunik Afrikamiit tikittoqartussaasoq. Aatsitassarsiornermut atortut piumaniarneqangaarmata qinnutigisat tunniunneqartarnerat assut sivisusarami.

Naatsorsuutigineqarpaali aatsitassarsiorfiit nunatsinneersunik amerlanernik atorfinittitsisalerumaartut Sisimiuni qaarusulerisutut ilinniartut amerliartornerat ilutigalugu.