SVP ajugaarujussuarpoq

Partii talerperliuniaq, Schweiziske Folkeparti, SVP, Schweizimi inatsisartunut ippassaq qinersinermi oqaluttuarisaanermi aatsaat taama annertutigisumik ajugaavoq.
oktobarip 22-at 2007 10:55

SVP 29 procentinit taaguunneqarpoq, Socialdemokratit, SP, 1991-imili qinersisoqarmat aatsaat taama angusaqarnerlutsigisut.

SVP-mi saqqumilaarnerpaap, inatsisinik atortitsinermut ministerip, Christoph Blocher-ip, qineqqusaarnermini ilaatigut qineqqusaarutigaa, nunasisut meerartaat pinerluttuliortarpata taakku ilaqutariit Schweizimiit anisitaasarnissaat anguniarneqassasoq.

Partiip SVP-p allagartarsuarmi qineqqusaarutimini assitaraa savat qaqortunik meqqullit sava qernertunik meqqulik isaarissakkut isimmillugu anisikkaat, taannalu uitsatigineqartorujussuuvoq.

Qineqqusaarnermi nuna allamiunut uumissuineq erseqqikkaluaqisoq, taamaattoq qernertumik amilimmik aatsaavissuaq inatsisartunut ilaasortanngortoqarpoq, inatsisileritooq, Angolami inunngorsimasoq, Ricardo Lumengo, Socialdemokratinut qinigaammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq