Sverigip Saamit inuiattut akuerai
SIKU Newsimi taama allaaserinnittoqarpoq.
Sverigip tunngaviusumik inatsisissaatut nutaatut siunnersuummi, Saamit inuiattut taaneqarput, naak siornatigut taamaallaat inuiaqatigiittut ikinnerussuteqartutut taaneqartarluarlutik.
Tamatumani oqaatsit usorsisimaarnerlu kisimik pineqanngillat, tamannami aamma inatsisilerinikkut pingaaruteqalersussaasoq inatsisinik ilisimatooq ilimasaarivoq, taamatullu allannguineq pingaarutilittut taallugu.
- Periaasitoqqat najoqqutaralugit inuiattut isigineqartut, ikinnerussuteqartutut isigineqartunit namminersulernissamut pisinnaatitaaffeqarnerusarput. Inuiaat naalakkersuinikkut pisinnaatitaaffeqarput, ikinnerussuteqartulli taamaallaat kulturikkut pisinnaatitaaffeqarlutik, inatsisinik ilisimatooq Ove Bring Sverigip radiuanut taama oqarpoq.
Taamatut allannguisoqarpoq, Sverigimi oqartussaasut Saamit inuiaqatigiittut ikinnerussuteqartutut isigineqarnissaanik aalajangernerat isornartorsiorneqarujussuareersorlu.
- Tamanna ajunngitsup tungaanut alloriarneruvoq, taama oqarpoq Saamit inatsisartuini ilaasortaq Sara Larsson, oqaatigaluguli taamatut oqaatsinik allannguinerup nunani tamalaani eqqartuussiveqarnikkut qanoq sunniuteqarnissaa suli nalorninartoqartoq.
