Sverigemut tunniunneqarnissani aarleqqutigaa

Wikileaksimik pilersitsisup Julian Assangep Sverigemut, pinngitsaaliisimasutut pasineqarfimminut tunniunneqaruni, eqqartuussisutigut naapertuilluanngitsumik pineqarnissani aarleqqutigaa.
februaarip 08-at 2011 08:35

Sverigemut tunniunneqarnissaa, eqqartuussivimmi ippassaq suliarineqarmat, tamanna erserpoq.

Sverigemi pinngitsaaliisimasutut pasisat eqqartuussivikkut suliarineri matoqqasumik ingerlanneqartarmata Assangep aarlerineranut pissutaavoq.

- Tusagassiortut eqqartuussivimmut iseqqusaanngippata, tamanullu ammasumik eqqartuussisoqanngippat, naapertuilluartumik eqqartuussisoqarsinnaanngilaq, Assangep illersuisua Geoffrey Robertson oqarpoq.

Assangettaaq annilaangassutigaa Sverigemut tunniunneqassaguni Sverigemit USA-mut tunniunneqarsinnaanini, taamalu pisoqarnissaa ilimanarsigaluttuinnartoq, oqaatigalugu.

USA-mi - illersuisuata oqaatigaa, diplomatit pappiliaataannik saaqquummiinermigut, kilitsissiatut sulisimasutut toqumut pillagaasinnaasoq.

Assange Londonimi decembarimi tigusaavoq tigummigallagassanngortinneqarlunilu. Tigummigallagassanngortinneqarnerali eqqartuussivimmiit atorunnaarsinneqarpoq, Sverigemulli tunniunneqassanersoq aalajangiiffiginissaata tungaanut nunamut allamukannginnissaanik eqqartuussiviup piumaffigisimavaa.

Australiamiu 39-nik ukiulik taanna, pappilissanik isertortunik, ilaatigut Amerikamiut Irakimi Afghanistanimilu sorsunnerannit, saqqummiussisarnermigut nunarsuarmi tusaamaneqalerpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq