Sverigemi Saamit ajugaasimaarput

Saamit Sverigip avannaarpiaani najugallit tuttuutitik ileqqut malillugit nunap ilaani annertuumi ivigartortittarsinnaagaat Sverigemi eqqartuussiviit qullersaata ippassaq akuersissutigaa.
Allattoq Carla Davidsen
maajip 03-at 2011 10:52

Suliaq ukiuni 14-ini ingerlanneqarsimavoq, svenskit nunaannarmi illoqarfinni pingasuni nunaatillit 100-t missaanniittut eqqartuussiviit qullersaannut suliakkiisuusimallutik.

Nunaatillit oqarsimapput tuttut orpippassuarni narsaatinilu ajoqutaasut, saamillu tuttuutitik nunaatiminni narsaatiminnilu angalaartittassanngikkaat. Ileqqutoqqalli taassuma kinguaariippassuarni atorneqarsimasup attatiinnarnissaat saamit uteriisissutigaat.

Suliaq ukiut ingerlanerini eqqartuussivinni arlalinni suliarineqartarsimavoq, saamillu eqqartuussivinnit tamanit taperserneqartarsimapput. Tamannalu tassa eqqartuussiviit qullersaanni ippassaq aamma pivoq, saamillu uppernarsarsinnaanngorpaat inuusaatsimik ileqqutoqqamillu ataqqineqarnissaat.

Suliaq naammassineqarmat nunaatillit erfalasutik qiteqquppaat.

- Suliamut ukiuni 20-ni akiuussimavunga, pakatseqaangalu, inuunerpulli ingelaqqittariaqarpoq, nunaatilik Berth Hägglund Norgemi Radioqarfimmut NRK-imut oqarpoq.

Saamit eqqartuussissuserisuat isumaqarpoq eqqartuussut saaminut tamanut sunniuteqassasoq.

- Eqqartuussut saaminut Skandinaviap avannaani najugalinnut tuttuutilinnut tamanut iluaqutaassaaq, saamit eqqartuussissuserisuat Norgemi Radioaqarfiup nittartagaani nrk.no-mi issuarneqarpoq.