Sverige talerpimmut illuariarpoq

"Neriunaateqanngitsoq", "sammiveqanngitsoq", "qinersineq ajugaasoqanngitsoq", tamakkuupput qinersineq pillugu unnuaq appisaluussinerit ilamininngui.

Sverige talerpimmut illuariarsimavoq, qularutissaanngilarlu partiit talerpilliit siornatigumut naleqqiullugu tapersersorneqarnerulersimasut. Sverigimi qinersisartut 55 procentiisa partiit talerpilliit qinerpaat, socialdemokratillu ukiuni 80-ini aatsaat taama qinigaanerlutsigaat.

Ministeriuneq Fredrik Reinfeldt naalakkersuisuni talerpilliusuni ingerlaannassaaq, amerlanerussutaarupporli.

- Inernera paasiuminaappoq. Amerlanerussuteqaannarnissarput neriuutigigaluarparput, Fredrik Reinfeldt unnuaq unnuap-qeqqariitsiarorlu oqarpoq.

Sverigedemokratit Fredrik Reinfeldtip suleqatigiumanngilluinnarpai, taakku takornartanut akeqqersimaartuunerarpai, Sverigedemokratit 5,7 procentinit taaguunneqarput, riksdagenimilu 20-nik ilaasortaatitaqassapput.

- Sverigedemokratit siuariarnerat qinersinerup ajortortaraa. Partiip, nynazismimit kingoqqisuusup, partiit talerpilliit piiaaffigaat. Taama pisoqarnera Sverigimut ajunaarneruvoq, aviisimi Dagens Nyheterimi taama allaaserinnipput.