Sverige: Danmarkip nammineerluni isumagisassaraa
Nunatsinni Naalakkersuisut siulittaasuat naapertorlugu, Sverigep Kalaallit Nunaat isumaqatiginninniarnerni atorfilittatigoortuni pingaaruteqartuni ukiuni kingullerni marlunni peqataatinnaveersaarsimavaa. Sverigemiulli nunanut allanut ministeriata Carl Bildtip tamanna ilumuunnginnerpaa.
- Danskit tamanna aalajangigassaraat. Danmark isumaqatigiissuteqarfigaarput, isumaqatigiissullu taanna siornatigut periaaserineqartarsimasunut naapertuuppoq. Matumani pisoq Kalaallit Nunaanni nunami namminermi politikkimit aallaaveqarnerugunarpoq.
Kisiannimi Kalaallit Nunaat isumaqatiginninniarnernut pingaarutilinnut peqataatissimanngilarsi?
- Naagga. Ilisimaneqareersutut isumaqatigiissutit Danmarkimut isumaqatiginninniutigisarpagut. Danmarkimi inatsisiliorneq Danmarkillu Nuullu akornanni pissutsit uagut susassaqarfiginngilagut. Danskit kalaallillu akornanni pissutsit matumani pineqarput. Kalaallit Nunaanni naalakkersuisunik nutaanik qinersisoqaqqammerpoq, immaqa aamma tamanna sunniuteqarsimasinnaavoq.
