Sverige assuarineqaqaaq

Kunngeqarfilli Sverige ullumikkut assorsuaq assuarineqarpoq. Nutaarsiassaqartitsivimmi Ritzauimi tamanna allaaserineqarpoq.

Aviisimi Dagens Nyheterimi pingaarnertut allaatigisami kungissaq Victoria, 31-nik ukiulik, isornartorsiorneqarpoq, angunni naalakkersuisullu akuersiteqqaarlugit asasani katinniarmagu.

- Inuinnartut naalakkersuisooqataanerput tulluusimaarutigisariaqaraluarparput. Nakimaannerpulli ippassaq ajoquserneqarpoq. Kunngeqarfiup eqqumiilliornera takutinneqarpoq. Kunngiitsuuffinngornissamut qanilliallappugut, aviisimi ilaatigut allassimavoq.

Aviisip socialdemokratiskiusup Östra Smålandip kunngeqarfik sakkortuumik aamma isornartorsiorpaa.

- Kunngeqarfik nalitsinni naalagaaffittut ileqqulersorani katersugaasivimmiikkuni ajunnginneruvoq, Östra Smålandimi allassimavoq.