Svenskit ministerii perulluliutaapput
Svenskit naalakkersuisortaavisa tusagassiuutitigut piffissami kingullermi sammineqarnerat milliallanngilluinnarpoq, nunanut allanut ministeriusup Carl Bildtip aningaasaqarnera aningaasarsiornikkullu soqutigisai tusagassiuutitigut saqqummiunneqarmata.
Sverigemi nunanut allanut ministeri uuliasioqatigiiffimmut Vostok Naftamut piginneqataassutinik pigisaqarpoq, tamatumalu saniatigut russit suliffeqarfissuanni gassimik qalluisumi Gazprom-imi aamma piginneqataalluni, piginneqatigiissutinilu tunissagunigit 4 millioni koruuninik iluanaarutigissagai, svenskit tusagassiutaat tusarliussipput.
Ruslandimit Tysklandimut nunakkut gassimut aqqusiornissamik russit suliffeqarfissuat Carl Bildtip piginneqataaffigisaa, svenskit naalakkersuisuinut qinnuteqarpoq, qinnuteqaallu Carl Bildtip ministereqarfianit aalajangersaaffigineqartussaammat, nunanut allanut ministerip pineqartumi inissisimanera apeqquserneqarpoq, tamaattoqarneralu Sverigimi inatsisartut nunami naalakkersuinikkut aaqqissuussineq pillugu ataatsimiititaliaannut suliassanngortitsissutigineqarluni.
