Svenskeq 57-inik ukiulik 16 millioner koruuninik akiliilluni aqqartartumut ilaasoq
Maanna paasineqarpoq svenskeq pisoorsuaq Qalasersuarmi immap naqqanut aqqartartumik ilisimasassarsiornissamut millionerpassuarnik aningaasaliisimasoq. Taamaalilluni svenskeq taanna aqqartartumut ilaasinnaanngorsimavoq.
Tassa 57-inik ukiulik Frederik Paulsen Qalasersuarmi aqqartartumut ilaalluni immap naqqanut ilisimasassarsioqataavoq. Aallartinnani russit tv-qarfiannut Russia Today-imut ima oqarpoq:
- Ruslandip nunanik issittunik sammisaqarnini ingerlateqqilertariaqaraa isumaqarama. Tamaani ilisimatusarnermut Rusland aningaasaliinerusariaqarpoq. Tamanna pinngortitami pissuseqatigiinneq, naalakkersuineq pinngortitamilu uumasut eqqarsaatigalugit pisariaqarmat, Frederik Paulsen tv-qarfimmut oqarpoq.
Taassuma Ruslandip issittumi soqutigisai pillugit ilisimasassarsiornermut ikiuutaasussamik aningaasaliinissani ajornartorsiutaasorinngilaa.
Russit nutaarsiassaqartitsiviat Itar-Tass naapertorlugu svenskeq aqqartartumut ilaasinnaanissaminut danskit aningaasaannik 16 million koruuninik akiliisimasoq oqaatigineqarpoq.