Svenskep aallaaniap nanoq meeterinik marlunnik qanitsigalugu aallaagaa
Aallaaniaq svenskeq tuttorpanniartilluni sisamanngornermi nammineq piniagaalerami quarsaartinneqarujussuarpoq.
Nannup aallaaniaq saassuppaa, piffissarli kingulleq atorlugu aallaaniaq aallaamminik ingissimasoq Sverigip Radioa Västerbotten paasissutissiivoq.
Aallaaniap nanoq meterinik marlunnik qanitsigilersoq aallaasimavaa. Angut ajoqusersimanngilaq, pisimasorli pillugu quarsaarujussuarsimavoq. Imminut illersorniarluni taamaaliorsimanerarpoq.
Nanoq pisarineqartoq maanna svenskit uumasut nakorsaasa misissussavaat.
Sverigimi uumasut nujuartat immikkut allagartaqanngikkaanni piniaqqusaanngillat killilersorneqarlutillu, taamaattumik nannut piniaqqusaanngillat.
Pisaqartoqarsimangaangalli nunap piniarnermut inatsisaanik unioqqutitsinertut ilungersunartutut nalunaarutigineqartarput.
Maanna politiit paasiniartussanngorpaat tuttorpanniaq imminut illersorniarluni igissimanersoq, imaluunniit inatsisinik unioqqutitsisimanersoq.
Huntersmagazine.com naapertorlugu Sverigimi nannut 3000-it missaanniipput.
- Sverigimi nannunniartarneq ukiut tamaasa sakkortuumik ussanneqarluartarpoq, ukiummi tamaasa nannunniarsinnaanermut allagartallit 300-it akuerineqartarput. Nunap immikkoortuisa namminneq pisarisinnaasat amerlassusaat aalajangiiffigisarpaat taamaallaat inatsisinut ingerlatsinermut tunngasut malinneqartussaallutik, tassanimi allassimavoq Sverigimi ikinnerpaamik 1400-nik nanoqassasoq, aviisi siorna maajimi taama allaaserisaqarpoq.
//ritzau
