Svend Jungep katersugaasivik Nuup Kommuneanut tunniuppaa

Eqqumiitsulianut katersugaasivik, Nuuk Kunstmuseum aappariinnit Svend aamma Helene Junge-mit ulloq manna tikillugu ingerlanneqarsimasoq, Nuup Kommuneanut ullumi tunniunneqarpoq.

Suliffiutilik Svend Junge tunniussinermi najuuttunut tikilluaqqusivoq, tussunngoqalunilu eqqumiitsulianik katersugaasivimmut matuersaatinikNuup borgmesterianut Agnethe Davidsenimut tunniussivoq.

Qalipagarpassuit eqqumiitsuliarpassuillu Svend Junge-p ukiut 50-ingajaat ingerlanerini katersorsimavai, eqqumiitsuliarpassuillu nunatta oqaluttuarisaaneranut pingaaruteqarluinnartut taamaasillutik Nuup Kommuneaniut akisussaaffigineqalerput.

Ilaquttat, ikinngutit, kommunimi atorfillit, kommunalbestyrelsimut ilaasortat ilaat, kiisalu tusagassiortut tunniussinermi najuupput.

Eqqumiitsulianik katersugaasivik aappaagu maajip qaammataani aatsaat kommunimut tunniunneqartussaagaluarpoq, Svend Jungelli napparsimanerata kingunerisaanik tunniussineq ullumi pivoq.

Nuup borgmesteria Agnethe Davidsen tunissummut qujamasoqisoq ima oqarpoq:

- Tunisinerata tunuliaqutaa eqqarsaatigissagaanni misigisaq sakkortoqaaq. Inuttaa massakkut napparsimavoq, taamaattumillu ajunngikkallarnermini isumannaarusussimavaa katersugaasiviup Nuup Kommuneanut tunniunnissaa. Tunissut angisoorujussuuvoq, eqqumiitsuliarpassuillu paarilluarnissaat pingaarnerpaatut akisussaaffittut tiguarput, Agnethe Davidsen oqarpoq.

Svend Jungep katersugarpassui inissaqartikkumallugit Nuuk Kunstmuseum maanna allisinneqaleruttorpoq.