Svend Hardenbergip misissuisitsinera isornartorsiorneqarpoq
Misissuisitsinerli peqquserluttuliornermik akiuiniarnermut suliniaqatigiiffimmit Transparency Greenlandimit isornartorsiorneqarpoq.
Misissuisinneqartummi tassaapput eqqartuussissuserisut Malling & Hansen Damm, suliffeqarfik, Transparency Greenland naapertorlugu Namminersorlutik Oqartussanut qanippallaamik attaveqartoq. Misissuisitsinerullu arlaannaannulluunniit attuumassuteqanngitsunit misissuisitsinertut taaneqarsinnaanera, suliniaqatigiiffiup apeqquserpaa:
- Inatsisilerituumut misissuisitsineq aallarnisarneqartoq, suliamut tamarmut peqataasup oqaaseqarneratut isigeqqajaavara, suliarlu qanoq inerneqarumaarnersoq pissanngatigalugu. Suliammi qanoq ingerlanneqarsimanersut pillugu politikkikkut kina imaluunniit kikkut akisussaaffimmik tigusissanersut pissanganarpoq, Transparency Greenlandip siulittaasuata tullia Aaja Chemnitz Larsen oqarpoq.
Sulisunik eqqartuussissulersuinerit amerlanersaat Malling & Hansen Damm illersuisoralugit aamma ingerlanneqartarput.
Namminersorlutillu Oqartussani atorfillit pillugit suliat eqqartuussissuserisunit misissorneqarnissaat taamaammat ajornartorsiutaasinnaasoq, Transparency Greenlandip ernummatigaa:
- Paasissutissat uannut saqqummiussatit ilumoorpata, taava eqqartuussissuserisut arlaannaannulluunniit attuumassuteqannginnerat apeqquserneqarsinnaavoq, eqqartuusissuserisummi Malling & Hansen Damm Namminersorlutik Oqartussanit amerlasuutigut suleqatigineqartarmata, Transparency Greenlandip siulittaasuata tullia Aaja Chemnitz Larsen oqarpoq.