Svend Hardenberg: Nukimmik atuinikillisarnissamut pilersaarut naak
Danmarkimi atuagassiaq, Nyhedsbladet Dansk Energi, ullumi saqqummersoq Nunatsinnik immikkut sammisaqarpoq.
Nukissiorfiit pisortaanik Svend Hardenbergimik apersuineq takkajaarsuaq saqqummiullugu, atuagassiap Nukissiorfiup nukimmik ataavartumut tunngatillugu suliniutai oqaluttuarai. Svend Hardenbergip assartuinermi nukimmik atuinerup pilersaarusiorneqannginnera aamma isornartorsiorpaa, tamannami Nunatsinni aamma CO2-mik mingutsitseqataammat.
Grønlandsbankip avatangiisinut mianerinnilluni iliuutsinut atukkiisalernera, atuagassiap aamma sammivaa.
Bankimi inuinnarnut sullissivimmi pisortap Peter Petersenip kajumissaarutigaa, uuliap akia Nunatsinni qaffanneqassasoq, Nunatsinni atuisut taamaalillutik illuminnik ussinnerulersitsinissamut piumassuseqarnerulerniassammata.
- Uulia liiterimut 4 koruuneqarani Danmarkimisut 11 koruuneqartuuppat, ussinnerulersitsinissamik suliniuteqarnissaq pilerigineqarnerussagaluarpoq. Isumaqarpunga uuliap akikinnerujussua ajornartorsiutaasoq, Peter Petersen naggasiivoq.
