Svend Aage Kielmann toquvoq

Svend Aage Kielmann, Kalaallit Nunaata Radioa 1958-imi pilersinneqarmat teknikkikkut pisortaaqqaartoq Værløsemi ullumi 86-inik ukioqarluni toquvoq. Kielmannip suliaasa ilagisimavaat, kalaallinik teknikerissanik ilinniartitsinissaq. Pilersaarutaareersutut ukiuni tallimani teknikkikkut pisortaareerluni Danmarkimut 1963-imi uterpoq, imminut pisariaarutsilluni atorfini kalaallimut teknikerimut tunniullugu.

KNR 1942-mi aallarteqqaartoq nutaanngorlugu pilersinneqartussanngormat aallartitsisussatut piareersartunut Kielmann DR’imit atukkiussaalluni 1956-imi ilaliuppoq, ilaatigut KNR’ip pisortaqqaava Frederik Nielsen, aallakaatitassiortorlu Hans A. Hansen suleqatigilerlugit.

Kielmannip soraarami KNR sullikkunnaanngilaa, DR’imi taanna pillugu siunnersuisuulerami, soraarninngorninilu tikillugu KNR sorpassuartigut sullittuarsimavaa, minnerunngitsumik studieteknikerit DR’imi ilinniaqqittarnerisa tungaatigut. Aamma TV-p KNR-imut attuumalernissaa 1970-ikkunnili ataatsimiititaliatigut pingaarutilimmik piareersaaqataaffigaa piviusunngortinniarneranilu ikiuuteqataalluni. Svend Aage Kielmannip nulia Bodil qangatsiarli peeruppoq, maannalu qimatarai panitik marluk taakkulu ilaqutaat.

Svend Aage Kielmann tallimanngorpat nal.13.30 ilisaassaaq Kirkeværløse Kirke-mit.