Sven Lyse: Namminersortut peqataalluarsinnaapput
Mittarfiit, nukissiorneq umiarsualiviillu ajornanngippat namminersortunit aningaasaliiffigineqarnissaat, aningaasaqarnermut naalakkersuisup Josef Motzfeldtip kissaagilluinnarpaa.
Pilersitassat 3,8 milliard koruunit tikillugit naleqarput taakkuli ilaannaat 700 millioni koruunit landskarsip akissaqartissinnaassavai.
Nunatsinni aningaaseriviit aappaanni Sparbank Vestimi pisortap Sven Lyse-p eqqumiigaa, oqartussat namminersortut aningaasaliinerunissaannik oqalunniannguarlutik, pilersaarutinik aqutsisutut inissittuartarnerat. Assersuutigaa Nuummi mittarfissamut koruuninik 2,2 milliardinik aningaasaliiniarneq. Taama aviisi Sermitsiaq ullumi saqqummersoq allappoq.
Sven Lyse isumaqarpoq namminersortutut inuussutissarsiuteqartut pilersitassarpassuarnut aningaasaliilluarsinnaasut.
- Naalakkersuisut pilersaarutinik aqutsisuujunnaarlutik aningaasaleeqataasussat aalajangiisuutittariaqalerpaat. Nutaamik ingerlatsisoqartariaqalerpoq. Namminersortut amerlanerussuteqarfiannik ingerlatseqatigiiffiliortoqartariaqarpoq. Selskabimi Namminersornerullutik Oqartussat aamma kommunit aallartitaat ikinnerussuteqarpata aningaasaliisussarsiorneq ajornannginnerussaaq, Sven Lyse oqarpoq.
