Svane: Torersumik piviusumillu oqallittoqarli
Kommuneqarfik Sermersuumi qinikkat naligiissaarinermut periusissaq pillugu innuttaasunut saqqummeqattaarnerat torinnginnerarlugu kanngunarneralugulu uparuarpai, torersumillu oqalliseqataanissaannik kaammattorlugit.
- Meeqqat, inuusuttut utoqqaallu naligiissaarinerup kingunerisaanik atugaasa ajornerulernissaannik oqaluunnerisigut allaanngilaq sallunaveeqqutitut atorniarneqartut, Jess Svane oqarpoq.
Naligiissaarinermut siunnersuut akuerineqassagaluarpat Qaasuitsup Kommunia naliissaarinermi isertitami qaavatigut 46 million koruuninik isertitaqarnerulertussaavoq, Kommuneqarfik Sermersoorlu naligiissaarinermi akiliutigeriikkami qaavatigut 56 million koruuninik akiliinerulertussaalluni.
AAMMA ATUARUK Sermersooq: Nalimmassaaneq annernarsinnaavoq
Kommuneqarfik Sermersuumi qinikkat innuttaasullumi kommuunip akiliuteqarnerulerneratigut atukkat ajorseriarnissaannut ernumanerat piviusorsiornerunnginnerluni?
- Kisitsisit piviusut agguaqatigiissikkaanni takuneqarsinnaavoq Kommuneqarfik Sermersoormiut inissisimanerat pavanerujussuarmiittut aamma appaallakkaluarpataluunnit agguaqatigiissikkaanni allanut naleqqiullugit suli qummut qaangerujussuarlugit inissisimasussaapput. Tamakku isumaqarpunga aallaavigalugit oqallittoqartariaqartoq.
Jess Svane nammineq Kommuneqarfik Sermersuumi kommunalbestyrelsemut qinigaasuuguni qanoq iliussagaluarpa?
- Uanga piviusoq takorusussagaluarpara, tamannaavorlu borgmesterit Naalakkersuisullu massakkut isumaqatigiissutigisaat. Tassanngaannit oqallinneq ingerlateqqissaaq. Kisiannili taannaluunnit suli pinngitsoq kikkut tamarmik maanna saqqummeqattaalerput allaat nikanartunngortitsiniaanermik nipeqalersitsillutik. Periuseq tamanna uanga akuerinngilara, taamaattuminguna torersumik oqallittoqarnissaa kaammatuutigigiga, Jess Svane erseqqissaavoq.
AAMMA ATUARUK ATAATSIMUT ISIGALUGU Kommunini nalimmassaaneq
Inuit Ataqatigiit siulittaasuata Sara Olsvigip tusagassiorfinnut allakkamini naalakkersuisut isornartorsiorpai.
- Naalakkersuisut paasinanngitsumik periuseqarnerat partiit isumaqatigiinniarsinnaanerannut mattussivoq, Sara Olsvig taama allappoq.
Tamannalu tunngavigalugu Naalakkersuisut tunngavilersorluakkamik paasissutissanik misissueqqissaarnerlu tunngavigalugit saqqummiusseqquai, taamaaliornikkut Naalakkersuisut, kommuunit partiillu akornanni oqallinnerup ajunngitsumik ingerlanneqarnissaa anguneqaqqullugu.