Svalbardimiit ikiorteqarluni annaassiniarneq iluatsilluarpoq

Angutit danskiusut marluk sermersuaq itivinniartillugu itiviliivillutillu angutip aappaa naamigut anniarujussualersimavoq, ajunaalerlunilu kalerrisaarummik nassitsisariaqarsimapput. Naamigut anniartoq nammineq nakorsaavoq, ilimagilersimavaalu qipinngululluni. Tamanna suli paasineqanngilaq, Svalbardimeereerunili Norgep avannaani illoqarfimmi Tromsømi napparsimmavimmut unugu unikkiartussaaq.

Ilisimasassarsiortut taakku marluk Twin Otterimik Nunatsinneersumik siullermik ikiorserneqaraluarput, timmisartorli apussarissumut mereersorlu timmisartortartut marluk merkanikeriusullu qangattaqqissinnaanertik ilimagiunnaarpaat.

- Taamaammat Svalbardimiit ikiortissarsiortariaqalerpugut, Kangerlussuarmi timmisartoqarfimmi annaassiniartartoq, Henrik Holm, ilisimatitsivoq.

- 1100 kilometerit sinnerlugit timmisartortussaavugut, tassa orsersornissatsinnut periarfissaqarata. Lock Woodip qeqertaanut uterlugulu ingerlassagutta Station Nordimi orsersortariaqarpugut.

Norgep avannaani annaassinairtartutnik suleqateqarnerput naammagisimaarparput, ajornartorsiuteqanngilagut, Henrik Holm oqarpoq.

Angutit marluk annaanniarneqartut tikinneqarnissaannut nalunaaquttap akunnera affaannanngortorlu Twin Ottterimik aqutsisut marluk qangattarsinnaanngorsimapput, Station Nordimullu ingerlasinnaanngorlutik.

Ilisimasassarsiortut qamutaat atorlugit aputaajaareerlutillu qangattarsinnaanngorsimapput. Timmisartortartulli marluk kisiisa ilaasorisinnaasimavaat, mekanikeri ilisimasassarsiortullu annaanneqartut marluk annaassiniartarumut Svalbardimeersumut ilaasariaqarsimapput, tassungalu ilaasimallutik nakorsat peqqissaasullu.