Svalbardimi aput sisoormat inuk ataaseq meerarlu ajunaarput
Aput sisummat illoqarfimmi Longyearbyenimi illut qulit eqqorneqarput. Angut ajunaartoq Longyearbymi najuaqarpoq. Illut qulit apummit sisusumit eqqorneqartut qanoq ajoqusersimatiginersut suli paasineqanngilaq.
Aputip sisuneratigut arlaqartut ajoqusersimapput.
Meeqqat pingasut annertuumik ajoqusersimapput inersimasullu tallimat Longyearbyenip napparsimavianut timmisartuunneqarsimasut, Nord-Norgemi universitetip napparsimavianit nalunaarutigineqarpoq.
Timmisartoq timmisartuutileqatigiiffimmit Norwegianimit pigineqartoq 47-nik ikiuiartortussanik ilaasoqarluni Tromsømit Longyearbyenimukartinneqarpoq
Timmisartumut ilaasut tassaapput, napparsimaveqarfinni sulisut, politiit, ikiuisartut aamma qimmit apummit matoorussaasimasunik ujalertinneqartartut.
Apummik sisoortoqaqqissinnaaneranik ilimasaaruteqarpoq. Maannalu annaassiniartut inunnik apummit matoorussaasimasunik nassaarnissartik naatsorsuutigaat.
Ajunaartoqarneranut atatillugu eqqugaasunut saaffiginittarfimmik illoqarfimmi piareersimatitsisoqarpoq.
Svalbardimi unnuaq silarluppoq ukiuni kingullerni 30-ni aatsaat taama ajortigaluni, aviisi Svalbardposten taama allaaserisaqarpoq.
