Suut tamaasa qimaannarlugit qimaasarput
Irakimi pissutsit innuttaasunut maanna ima ilungersunartigipput, allaat irakimiut qaammatit tamaasa 40.000-it 50.000-illu akornanni amerlassuseqartut suut tamaasa qimaannarlugit qimaanissartik toqqartariaqartarlugu. Irakip ilaanut allamut, imaluunniit nunanut allanut, qimaasarput.
Inuttut pisinnaatitaaffinnik illersuiniaqatigiiffimmit, Amnesty Internationalimit, mianersoqqussutigineqarpoq, qimaasut ima amerlatigilermata, allaat inunnut ajunaarnersuaqarnissaa ernumanarsilluni.
Irakimiit qimaasut nunani Irakip saniliiniittuni Jordanimi Syriamilu takussaaleraluttuinnarput. Irakimiut katillugit 4 millioninik amerlassuseqartut qimaasimassangatinneqarput. Taakkunannga 2 millionit Irakip nammineq iluani qimaasuupput, 2 millionillu Jordanimut Syriamullu qimaasuullutik.
Amnesty Internationalimiit oqaatigineqarpoq nunat qimaaffigineqartut taakkua marluk ajutoorluinnassanngippata avataaniit ikiorserneqartariaqartut.
Amnesty Internationalip Kangiani Qiterlermi allaffeqarfiani pisortap oqaatigaa inunnut ajunaarnersuaqarnissaa ernumanarsisoq.
Tassami Irakimiut qimaasut atugarlioqalutik inuummata. Taamaattumik pisariaqarluinnarnerarpaa USA aamma EU Irakimiunut qimaasunut aningaasatigut aamma qimaasunut tigusinissamut ikiuuttariaqarnerat. Naalagaaffiit Peqatigiit qimaasunut isumaginniffiat aammattaaq taamatut isumaqarpoq.
UNCR Genevemi aqagu aqaguagulu ataatsimeersuartitsissaaq. Aammattaaq matumani USA aamma EU Irakimiunut qimaasunut 4 millioniusunut iliuuseqarneroqqullugit qinnuigineqarnissaat naatsorsuutigineqarpoq.
