Suummita orpiup ataanut ilineqassappat?
Oqarasuaat angallattagaq Iphone Grønlands Radio Center naapertorlugu tassaavoq angajoqqaarpassuit panimminnut niviarsissanut ukiormanna tunissutissatut toqqagaasa ilaat.
Nioqqutissat tunisaanerpaat ilimagineqareersutut tassaapput Ipads, pinnguaatillu PS3-t. Aamma Grønlands Radio Centerimi juullimut tunisaanerit ilagaat isiginnaarutit 37 tommit. TV-kkut kanalit analogit ukiortaamiit atorunnaarnissaat eqqarsaatigalugu arlallit asasaminnut tunissutigissallugit piukkummasigit.
Pinnguaarniarfimmi Atsa's Legelandimi tunissutissat pisiarineqarnerpaat tassaapput assiliaaqqat arsaattartunik tusaamasanik assitallit. Niviarsiaqqanullu pinngussat tunisaanerit ilagaat inuusamut aneerussiveeraq Briomeersoq.
Pinnersaarniarfinni atit tusaamasaareersut piumaneqarnerupput, soorlu pinnersaatit Georg Jensenimeersut, taakku Unik-imi pisiarineqarnerpaanut ilaapput. Illuatungaani angutit arlaqartut Hugo Bossimik passimmiortaarnissartik ilimagisariaqasssavaat. Pinnersaatilli niviarsiaqqat kisimik atorneq ajorpaat, tassami Unik-imi tunissutissatut alutorsaatigineqartut ilagaat nukappiaqqanut iverutaasat, arsaattartup tusaamasap David Bechamip atortagaasa assigi.
Pisiffiup tipigissaataarniarfiani tunisaanerpaaq tassaavoq tipigissaat kingulleq Dolce & Gabbanameersoq. Nota-Benemilu cd-mik pisinissamut uppernarsaatit amerlasoorpassuit tunisaalereerput.
Atuagaarniarfimmi Atuagkani Nuummiittumi juullimut tunisaanerpaat ilagaat atuagaq qanittukkut saqqummersoq, 'Tuttu qaqqamiit qanermut' Michael Rosingip atuakkiaa, kalaallisut qallunaatullu saqqummersinneqartoq.
Juullimi ileqqutoqqat pingaartinneqartarput,tamanna aamma nerisassanut atuuppoq, tassami qeerlutooq puulukiminerlu angerlarsimaffinni arlalinni pisarneq malillugu ukiormanna nerineqartussat pingaarnersaraat. Taamaattoq pissutsit allanngoriartornerat Brugsenimi Nuummi ukiuni kingullerni pingasuni maluginiarneqarpoq, tassami nerlerit tunisaanerat marloriaammik qaffassimagami.
