Susassaaleqingaaramik qimaasarput

Tarnimikkut nappaatillit misissorneqarlutillu katsorsarneqartarfiini uninngasut sooq qimaasarnersut, Danmarkimi nunat immikkoortuini aqutsisoqarfinnit misissorneqaqqammerpoq.

Misissuinerup takutippaa uninngasut amerlanersaat susassaaleqingaaramik qimaasartut, taama aviisimi Jyllands-Postenimi allaaserineqarpoq.

- Suffissaaleqineq tarnimikkut nappaatillit uninngaviini ajornartorsiutaanerpaavoq, Danske Regionit siulittaasuat Bent Hansen, oqarpoq.

Tarnimikkut nappaatillit uninngavii tassaasarput illutoqarsuit

periarfissakitsuni inissisimasut.

- Uninngasut suffissaqarneq ajorput, tamanna ajornartorsiutit amerlanersaannut tunngaviuvoq ilungersunarluinnartoq, Bent Hansen oqarpoq.

- Timersorfissaqanngillat assigisaannilluunniit sammisaqarfissaqaratik, allaammi nerriviup qaaniittartut arsaaffeeqqat inissaqartinneqarpiarneq ajorput, nassuiaavoq.

Suffissaqartitsinnginnerpaanut ilaavoq tarnimikkut nappaatillit uninngaviat Risskovimiittoq, Kalaallit Nunaanneersunut aamma uninngaviusartoq.

Risskovimi ulluinnarni aqutsisut eqqoriarpaat qimaasarnermut pissutaanerpaat tassaasut, illutoqarsuunera ullormullu sammisassaqartitsinngippallaartarneq.

- Paasisat tunngavigalugit naliliisinnaagunarpugut, suffissaaleqineq pillugu qimaasoqartartoq. Taamaammat isumaqarpunga uninngavinni suffissaqartitsinerusalernissaq pimoorullugu suliniutigisariaqaleripput. Napparsimasummi susassaqartikkutsigit qimaanissartik pisariaqartinnavianngilaat. Maannali avatangiiserisavut eqqarsaatigalugit imaaliallaannaq aaqqiisinnaagunanngilagut, Per Jørgensen, Jyllandip Qeqqani tarnimikkut napparsimasunik inunnillu isumaginninnermik suliallit nakorsaanerat nassuiaavoq.

Assersuutigalugu Risskovimiit qaammatini pingasuni kingullerni kalaallit qulit qimaasimapput, maajip sisamaani marluk, aggutsip arfernani marluk aggustillu arfineq-pingajuani arfinillit.