Susanne Ignatiussenip Nuka Papellu Ilulissani coronamik tunillatsissimasoqarnera ernumassutigigaat.Assi: Privatfoto: Nuka Pape / Susanne Ignatiussen

Susanne Nukalu Ilulissani: Juullimi ataatsimuulerussi mianersorisi

Coronavirus juullisioqatigiinnginnermi eqqumaffigineqartariaqartoq, Ilulissani kioskimi sulisoq Nuka Pape oqarpoq. Ilulissanimi inuit arfinillit coronavirusimik tunillanneqarsimasuupput.

Corona pillugu tupaallannartumik sapaatiummat tusarlerneqaqqippugut.

Ilulissanimi inuit arfinillit coronavirusimik tunillanneqarsimasut paasineqarpoq. Taakku tamarmik Danmarkimiit tikeqqammerput.

Tikinnerminniit ullut tallimat qaangiunneranni misissorteqqikkamik coronavirusimik tunillatsissimasut paasineqarpoq.

Ilulissanilu innuttaasut ilaat ernumasut KNR-imiit oqaloqatigaagut.

Angerlarsimaannarneq misissorteqqinnerlu

Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat. 

Angerlarsimaannarninni pisuttuarsinnaavutit aamma najugaqatigisannut qanillisinnaavutit. 

Niuerniarsinnaavutit.

Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.

Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.

Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.

- Nunarsuatsinni taama siaruaatsigisoq, maani siaruaatileraluarpammi annertunerusumik? Kalaallit ikitsigaluta, siaruaatipilooraluarpammi?

- Neriuppunga ilaqutariit juullimi coronamut mianersorlutillu juullisiorluarumaartut.

Meeqqerivimmi sulisoq Susanne Ignatiussen taama oqarpoq.

Tuniluunneq Danmarkimiit tikittumeerput

Tunillatsissimasut arfinillit Danmarkiminngaanniit Ilulissanut decembarip 15-iani 16-ianilu tikipput.

Inuit pingasut ilaqutariit, taakkunani marluk nunatsinnut tikittut, pineqarput. Aamma marluk allat nunatsinnut tikittut tunillatsissimapput.

Aamma arferngat nunatsinnut allamik angalaqateqarluni nunatsinnut tikippoq, angalaqataali tunillatsissimanngilaq.

Nuka Pape Ilulissani mittarfiup kioskitaani sulisarpoq, taassuma inuppassuit ulluinnarni naapitarpai, ullunilu makkunani aamma Danmarkimeersunik pisiniartoqallattaasimavoq.

- Ilaatigut pissanganartarpoq, taakku Danmarkimiit tikittut ilaatigut pisiniartittarakkit, taannartaa pissanganartarpoq.

AAMMA ATUARUK Borgmesteri Ilulissani inuit tunillanneqarsimasut pillugit: Tuniluuttoqarnera pakkersimaarneqarpoq

Taassuma coronap tuniluutilertinniarnagu tikerartut oqartussanit maleruaqqusanik malinninnissamik kaammattuuteqarfigai.

- Assat asattuaannarnissaat, inuit qanillinaveersaarnissaa, attornaveersaarnissaq spritillu atortarnissaa, Nuka Pape taama oqarpoq.

Nunattali nakorsaanerata, Henrik L. Hansenip innuttaasut coronamut ernumaqqunngilai.

- Kikkut tunillatsissimasinnaanersut pillugit paasiniaaneq ingerlalluartupilussuuvoq politiit suligasuarput tikittullu tamaasa attaveqarfigalugit.

Nakorsaaneq KNR-imut oqarpoq nangillunilu.

- Ilulissani pisut eqqissilluta malinnaavigaagut, taakkuami tikinnerminiilli angerlarsimaannaqqusaanermut maleruagassat malippaat, allanillu tunillatsisimasinnaasunik pasitsaassaqarata, Henrik L. Hansen oqarpoq.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 22.882
  Tunillanneqarsimasut
31
  Peqqisseqqittutut nalunaarutigineqartut 31
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: Nunatsinni Nakorsaaneqarfik
  Nutarterneqarnera:
  maajip 5-at 2021 nal. 10:45