Susan Aglukark meeqqanik inuusuttunillu ikiuiniaqataavoq

Canadami naggueqaterput erinarsortartoq Susan Aglukark aningaasaateqarfimmik meeqqanik ikiuiniarnermik siunertalimmik aqutsisuuvoq.

Canadap issittortaani meeqqat inuusuttullu inuuniarnermikkut ajornartorsiortorujussuupput. Pissakilliorneqaqaaq, ilaqutariit persuttaaffiusut amerlaqaat imminullu toquttarnerit ikigisassanngillat. Erinarsortartoq Susan Aglukark, meeqqat inuusuttullu inuuniarnermikkut atugaannik pitsanngorsaaniarpoq. Kattuffissuup Inuit Tapiriit Kanatami allat peqatigalugit aningaasaateqarfimmik pilersitsinera - meeqqanik inuusuttunillu issittumiittunik ikiuinissamik siunertaqartoq - Susan Aglukark-p pisortaaffigaa.

Issittup meerartaasa inuusuttaasalu Canadap sinnerani meeqqat inuusuttullu - ilinniarnermut, peqqissuunermut siunissaqarnermullu - periarfissaqarnerattulli periarfissinneqarnissaat aningaasaateqarfiup "Arctic Children and Youth Foundation"-ip siunertaraa,

Susan Aglukark radioavisimut oqarpoq, suliniut nutaaq allartitartik tassaasoq Kamajiit, "Paarsilluarneq"-mik kalaallisut taasinnaasarput.

Suliniummi angajoqqaat meeqqamik atuarnerannut ilinniarnerannullu malinnaanerulersinniarneqarput.

Nunaqarfinni angerlarsimaffiit toqqissisimaffiusut sisamat toqqarneqartarput, nunaqqataasullu meerartaat inuuniarnermikkut ajornartorsiortut angerlarsimaffinnut ingerlalluarfiusunut pulaartinneqartarput. Pulaarneranni piumassutsiminnik suleqataasut, politiiusinnaapput, ilinniartitsisuusinnaapput allaallutilluunniit, sapaatip-akunneranut ataasiarlutik pulaaqataasarput.

Piumassutsiminik suleqataasup nakkutigissavaa meeqqap atuarnerminut malinnaanissaa, toqqissisimasumik ingerlaqqinnissaa, nuannaarnissaa peqqinnartunillu nerisaqarnissaa.

Takorloorneqarpoq taama suliniuteqarnerup kingunerissagaa, meeqqat angerlarsimaffitsik immaqa imigassamik ajornartorsiuteqarfiusoq persuttaaffiusorluunniit qimalaarlugu inuunermik allamik toqqisisimaffiusumillu misigisaqartinnissaa, ilinniagassatigullu ikiorneqarsinnaanissaa. Aningaasaateqarfiup aamma siunertaraa suliniutinik angajoqqaanik ilinniartitsinermik imaqartumik aallartitsinissaq. Ilinniartitsinerup kingunerissavaa angajoqqaat meeqqamik atuarnerannut ikiuutaanerulernissaat.

Sulimiunnut tamatumunnga Susan Aglukark isumalluaqaaq.

Suliniut aallartisarniarlugu 2010-p aallartisimalernerani nunap immikkoortui sisamat naggueqatigiinnit Inunnit nunagineqartut tikeraarneqareerput.

Ilanngutassiortorput Marianne Stenbæk taama tusagassiivoq.