Sunngiffimmi sammisassat amigaatigineqarput
Sunngiffimmi sammisassatut neqeroorutit, ilaqutariit, inuusuttut utoqqaallu ataatsimoorlutik sammisinnaasaat, Nuummi amigaatigineqarput.
Tamakku suli pilersinneqanngillat, kisiannili katersortarfimmi, ippassaq soraarnerup nalaani, ataatsimiititsisoqarmat tamakku kissaatigisatut saqqummiussuunneqarput. Silami ingerlanneqarsinnaanissariaqartut oqaatigineqarpoq. Tamakkulu ilaatigut silami ingerlanneqarsinnaasariaqarput.
Nuup Kommuniata sunngiffimmi neqeroorutigisartakkani nutartileruttorpai, tamatumunngalu atatillugu innuttaasut suliffeqarfiillu isumassarsiaminnik saqqummiusseqqullugit aggersarsimallugit. Arlallillu isumassarsiaminnik saqqummiussipput, ilaatigut tassaasunik; ulluunerani timersorneq, taalliortarfik erinarsuusiortarfillu, illu sammisassaqartitsivik, ilaqutariillu silami sammisaqarfigisinnaasaat.
Ataatsimiititsinermi inuit 50-it missaat peqataapput. Neqeroorutit pioreersut iluarisimaarneqarput, taamaattorli neqeroorutit tamarmiusut takussutissaqarnissaat amigaatigineqarluni.
