Sunngiffimmi piniarnermut allagartaq maajip aallaqqaataa nallertinnagu akilereersimassavat

Aasakkut ukiakkullu tuttunniarnissamut umimmanniarnissamullu akuersissutinik qinnuteqarsinnaanissamut, sunngiffimmi piniarnermut allagartaq, tuttut umimmaallu pillugit nalunaarutit atuuttut malillugit, maajip aallaqqaataata sioqqullugu akilereerneqassaaq.
Assi © : Mikkel van Overeem/KNR
Allattoq Ivik Kristiansen
apriilip 13-at 2016 09:38

 

Piniarnermut Naalakkersuisoq Karl-Kristian Kruse taama nalunaaruteqarpoq.

Tassani tunngavigineqarpoq piniarfinni amerlanerpaani ukiuni arlaqartuni tuttunik umimmannillu kisitsisoqarnikuunnginnera tamannalu pillugu biologinit siunnersuuteqartoqannginnera.

Tamanna pillugu maajip aallaqqaataani, kingusinnerusukkulluunniit sunngiffimmi piniarnermut allagartamut akiliisimasut, 2016-imi aasakkut ukiakkullu tuttunniarnissamut umimmanniarnissamullu akuersissutinik tunineqarsinnaassanngillat.

Ilutigalugu aalisarnermut piniarnermut nunalerinermullu naalakkersuisoqarfiup paasisimavaa, tuttunniarnissamut umimmanniarnissamullu akuersissutit tunniunneqartartut pingajorarterutaat inorlugu utertinneqartartut.

Akuersissutit pisanillu nalunaaruteqarneq, piniarnerup naammassineqarnerata kingornatigut kingusinnerpaamik sapaatit akunnerisa marluk qaanngiunnerani utertinneqartussaapput, tamannalu pisaqarsimanngikkaluarluniluunniit aamma atuuppoq.

Akuersissutillu iluamik utertinneqartannginnerat pissutigalugu tuttoqatigiit umimmaqatigiillu qanoq innerat nalileruminaattoq, Namminersorlutik Oqartussat allapput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk