Sunngiffimmi aalisartut kapisilinniarnissamut akuersissuteqalissasut

Kapisilittassiissutigineqartut ukioq manna 30 tonsiupput, taakkunannga 20 tonsit inuussutissarsiutigalugu aalisartunut pisassiissutigineqarput, sinneri sunngiffimmi aalisartunut pisassiissutigineqarlutik.
Allattoq Mads Lynge
aggustip 07-at 2018 10:59

Namminersorlutik Oqartussat nittartagaanni tamanna atuarneqarsinnaavoq.

Nunatsinni nammineq atugassatut aalisartoqarsinnaavoq, imminut pilersorluni aalisartoqarsinnaalluni. Nunattami NASCO-mut isumaqatigiissutaa naapertorlugu nunatsinni kapisilittarineqarsimasut nunanut allanut tunineqassanngitsut nunatta pisussaaffigaa.

Inuussutissarsiutigalugu aalisartut taamaallaat tunitsivinnut kalaalimineerniarfinnullu siunissami tunisisinnaalissapput.

Taamaalilluni neriniartarfinnut, napparsimavinnut assigisaannullu toqqaannartumik tunisisarunnaassapput. Inuussutissarsiutigaluguli aalisartut kalaalimineerniarfinni tunisisarsinnaanissaat, peqqussummi allannguutit pingaarnersaasa ilaanni erseqqissaassutigineqarpoq.  

Sunngiffimmi aalisartut taamaallaat namminneq atugassaminnik kapisilinniarsinnaassapput.

Nalunaarummi allannguutit pingaarnerit ilaat tassaavoq sunngiffimmi aalisartut kapisilinniassagunik akuersissummik peqqaarlutik kapisilinniartalersinnaanissaat.

Aamma kapisilinniarsimanngikkaluartut kapisilinnillu pisaqarsimanngitsut kapisilittarisimasat pillugit pinngitsoorani nalunaaruteqartussaatitaalissapput.

Aggustip 15-iannit oktobarip 31-annut kapisilinniartoqassaaq.

Akuersissummut qinnuteqarfissaq uani nassaarisinnaavat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq