Sungiusarnissaq Tunup Avannaarsuanut nuutinneqarpoq
Sisorarluni sungiusarnissamut Kangerlussuarmi aputeqanngippallaaqaaq, taamaammat Siriusimi peqataanissamut ilinniartut nutaat piareersarlutik ukiuunerani sungiusarnertik kingulleq Tunup Avannaarsuani ingerlattariaqarpaat. Kangilinnguani Sakkutooqarfik taama ilisimatitsivoq.
Siriuspatrulje-mi inuttassat nutaat Kalaallit Nunaanni piffissami maani piareersarput. Issittumi pissutsinut Kangerlussuarmi sapaatip akunneri marluk sungiusarput, sisorarnermullu ullut tulliuttut 14-it sungiusartussaapput. Kitaanili aputeqanngingajammat ullut sungiusarfissat kingulliit Tunumi Mestersvigimi ingerlanneqassapput.
Siriusimut piareersartut arfineq-marluupput, ukiuuneranilu sungiusarneq februaarip ulluisa 27-anni taamaatissaaq. Pikkorissarneq Danmarkimi nanginneqassaaq. Piareersartuni angusisut Siriuspatruljemut aasaru juulimi utissapput.
