Sungiusaatigalugu unamminermi Brasilia ajugaavoq

Unammineq naligiiffigaluariarluni taamaattoq Brasilia 35 - 30-mik ajugaavoq unamminerup immikkoortuani siullermi 16 - 15-imik inissisimagaluarluni. Aqqaluk Sørensen kalaallini isertitaqarnerpaalluni arfinilinnik isertitaqarpoq.

Arsartartut 16-it tamarmiullutik unammeqataapput, unamminermilu minutsini kingullerni qulini Brasilia siuartuuvoq, sungiusaasoq Jacob Andreassen Port Saidimiit oqaluttuarpoq, inersuarmilu unamminermi silaannarissarfeqanngitsumi 32-nik kiassimavoq. Port Saidimi silami alanngumi 42-nik kiappoq.

Sisamanngorpat unammineq siulleq Estlandimut unamminerussaaq. KNR-Radio aamma Igitsinimi peqataavoq. Aviisi Sermitsiaq suleqatigalugu tusagassiortoq Noah Mølgaard Port Saidiliarpoq, taavalu sisamanngorpat tallimanngorpallu unamminernit siullernit marlunnit unnukkut radioaviisini nalunaaruteqartoqarumaarluni.

Arfininngorpat nal. 9.30 KNR-Radiomi U21-mi nunarsuarmi pissartanut - Sverigemeersunut - unamminissaq pissanganartoq toqqaannartumik aallakaatinneqartoq malittarineqarsinnaavoq. Ataasinngorpat nal. 14.30 Hollandimut unammineq aallakaatinneqassaaq kiisalu marlunngorpat nal. 9.30 unammineq kingulleq - Kalaallit Nunaata aallarnisaataasumik unamminera kingulleq, Libyamut unammineq, aallakaatinneqassalluni.

Tamakkua tamarmik KNR-Radiomiissapput. Soorunalimi aamma nunarsuarmi pissartanngorniunnerit knr.gl-imi malittarissavavut.