Sungiusaammik suliffeqarfiusinnaasut amerlineqarnissaat siunniunneqarpoq
Tamannalu iliuuseqarfiginiarlugu sungiusaammik suliffiusinnaasut amerlisinneqarnissaat kiisalu ilinniakkaminnik naammassisartut amerlinissaat Naalakkersuisut aqqutissiuukkusukkaat Ilinniartitsinermut Pilersaarut II-mi aamma Ilinniartitsinermut Periusissiaq-mi maanna tusarniaassutigineqartuni atuarneqarsinnaapput.
Ullumikkut pissutsit atuuttut malillugit suliffeqarfiit ilinniartunik ataasiakkaanik ukiunik arlalikkuutaartunik sungiusaammik suliffeqartitsiniarlutik isumaqatigiissusiortarput, tamannalu suliffeqarfiit arlallit ajornakusoortittarpaat qulakkeersinnaanerlu ajorlugu, tamatuma kingunerisaanik sungiusarfiusinnaasunik pilersitsinngitsoortoqartarpoq.
Tamanna allanngortinniarlugu Naalakkersuisut ilinniarfeqarfinnik suliffeqarfinnillu oqaloqateqarusupput, sivisuumillu isumaqatigiissusiortarnerit atorunnaarsillugit sivikitsukullakkuutaanik isumaqatigiissusiortoqarsinnaalernissaa aqqutissiuukkusuppaat, suliffeqarfiit taamaalillutik ajornannginnerusumik ilinniartunik tigusisinnaalerniassammata.
Tamatuma anguniarnissaannut sakkussat ilagisinnaasaattut taaneqartut tassaapput Naalakkersuisut atortussaminnik pisiartorfigisartagaat kiisalu sanaartortitsisussatut toqqagaat sungiusaammik suliffeqarfinnik pilersitsinissamut piumasaqarfigineqarsinnaanngornissaat. Taamatuttaaq pisortat suliffeqarfiutaasa akisussaaffimmik tigusillutik sungiusaammik suliffiusinnaasunik amerlanerusunik pilersitsinissaat kissaatigineqarpoq.
Danmarkimi sungiusaammik suliffiusinnaasunik pilersitsinissaq aamma anguniagaavoq. Aalborgimi Odensemilu kalaallit illuutaat suliffeqarfinnik attaveqareerput naatsorsuutigineqarporlu aappaagumit inissat 25-t pilersinneqarsimanissaat.
