Sungiusaamik sulisarneq allanngortiteriffigineqalerpoq

Inuussutissarsiutitigut ilinniagaqalerusuttut ilinniarfimmut isernissamut akuerisaagaluarlutik sungiusaammik suliffigisinnaasamik amigaateqarnertik peqqutigalugu ilinniakkaminnik aallartitsinngitsoortarput.

Suliffeqarfiit sungiusarfiusinnaasut ikippallaarneri ajornartorsiutaavoq aammali sulisitsisut sivisuumik ilinniartuuteqarnissamut isumaqatigiissusiornissartik tunuarsimaarfigisarpaat.

Ilinniartulli amerlanerusut ilinniakkaminnik naammassinissaat anguniarlugu sivikitsukkuutaanik ilinniartuuteqarnissamut isumaqatigiissusiorsinnaalernissaa Naalakkersuisut Ilinniartitsinermut Pilersaarutaat II-mi maanna tusarniaassutigineqartumi siunnersuutigaat.

Siunnersuut tamanna Sulisitsisut Peqatigiiffianit ilalerneqarpoq:

- Siunnersuut assut ilalernarpoq, taamaaliornikkut sulisitsisut piffissami suliassaqarnerminni ilinniartunik tigusisinnaanissartik pilersaarusiorsinnaanngussagaluarmassuk. Assersuutigalugu sulisitsisut sanaartornermik suliallit siumoortumik ukiuni arlalinni suliassaqarsinnaanissartik qulakkeersinnaaneq ajorpaat, ilinniartunillu isumaqatigiissutit ukiut sisamakkaartarmata ilinniartunik tigusinissartik ajornakusoortittarpaat. Sivikitsukullakkuutaanilli isumaqatigiissusiortoqarsinnaanngoraluarpat pilersaarusiornissaq ajornannginnerulissagaluarpoq, Karsten Lyberth-Klausen Sulisitsisut Peqatigiiffianni allaffimmi pisortaq nassuiaavoq.

Isumassarsiat nutaat aamma ilagaat Danmarkimi suliffeqarfinni sungiusaammik sulisitsisinnaalernissaq, inissat 25-t Aalborgimi Odensemilu kalaallit illuutaat suleqatigalugit aappaagumit pilersinniarneqarput. Tamanna pillugu Karsten Lyberth-Klausen ima oqarpoq:

- Inuusuttut Danmarkiliarusuppata ajunngivippoq, maanili periarfissat naammakkaluarput misissorluartariaqaraluarlutillu. Imarsiornermut tunngasutigut suleqatigiissitami assersuutigalugu sulisitsisut sinnerlugit ilaasortaavunga, sungiusaammillu suliffiusinnaasut 59-it ilaatigut navigatøritut, maskinmesteritut, aalisarnermik teknologitut ilinniartut sungiusarfiusinnaasut pilerseqqammerpavut. Niuernermik suliallit aalisarnermillu inuussutissarsiortut angusarput iluarisimaarpaat. Suliassaq tullinnguuttoq tassaavoq ilinniartussarsiarnissaq, ilinniartullu ukiumi ataatsimi imarsiorlutik sungiusaammik sulereerlutik ilinniarfeqarfimmut uterunik ilinniakkaminnik aalajangersimasumik sammivilimmik toqqaasinnaalissapput, Karsten Lyberth-Klausen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat