Sungaartunik kavaajallit ukiuni 25-ni Nuummi aqqusinerni toqqissisimatitsipput
Ulloq akissarsiffiuvoq, pisarnertullu Unnuarissat aqqusinermi angalaassapput.
Niels Nielsen aallaqqaataaniilli peqataasimavoq. 2000-imi septembarip arfineq-aappaanni Nuummi peqatigiiffimmik Unnuarissanik pilersitseqataavoq, maannalu siulittaasuulluni.
Unnuarissat sisamat aqqusinermut appakaateqqammiinnartut inuusuttuaqqanit orninneqarput. Sorusunnersut erseqqippoq - sukkuaqqanik kavaajaasa sungaartut kaasarfiiniittut ilaannik perusupput.
- Inuusuttuaqqat attaviginiarnerinut sukkuaqqat atortarpavut, Niels Nielsen oqaluttuarpoq.
Tamanna inuusuttuaqqanik oqaloqateqarniarnermi ajornannginnerulersitsisarpoq - Niels Nielsenilu naapertorlugu tamanna iluaqutaavoq.
- Meeqqat inuusuttuaqqallu nalunngilaatigut ujartarlutalu.
Takornarianit toqqissisimatitsisunut
Ukiut 25-t qaangiuttut kavaajaq sungaartoq qanoq isumaqarnersoq amerlanerit nalunngilaat, taamaattuaannarsimanngilarli. Niels Nielsenip pisuttuaqataanerit siulliit ilaat immikkut eqqaamasaqarfigaa:
- Nuussuup atuarfiata eqqaani inuusuaqqat ornippaatigut ikiorsinnaanerlutalu aperaluta. Isumaqarsimapput takornariaasugut sungaartunik kavaajallit, illalaarluni oqaluttuarpoq.
Sungaartunik kavaajallit unnukkoortui illoqarfimmiittumi tivolimi angalaareerlutik Qinngorpumukarlutik bussinut ikipput. Unnuarissat akeqanngitsumik bussertarput.
- Bussinik ingerlatseqatigiiffiup ilaasarnerput nuannaarutigaa, ilaagaangattami bussit eqqissisimaffiunerulaalertaramik. Taakkua (meeqqat inuusuttullu, aaqq.) qiiatillutik bussit kissasserfittut atortarpaat, Niels Nielsen oqarpoq.
Tunniussaqaqqinneq
Stella Mathiasenip Hans Lyngep atuarfiani nukappiaqqat arsami unammisut akuleruffigipallappai. Immikkut ittumik nukissaqartuuvoq, inuusuttuaqqallu tamanna nuannersumik qisuariarfigaat.
- Taamatut inuttaqarnerput nuannaarutigaarput, Niels Nielsen oqarpoq Stellalu arsamik isertitsitsiniarsarisoq qiviarlugu.
- Meeqqanik ikiuerusunneq, inussilaarneq allanngueqataasinnaanerlu eqqarsaatigalugit Unnuarissanut ilanngunnikuuvunga, Stella Mathiasen oqaluttuarpoq.
Stella Mathiasen qaammatini tallimaannarni Unnuarissaniippoq, sunniuteqaqataareerporli.
- Qanittukkut Stellap meeraq annersimasoq tuppallersarpaa, Niels Nielsen oqaluttuarpoq.
Ikiuinertaaq Niels Nielsenip kajumississutigisarpaa. Ukiut ingerlaneranni inuusuttuaqqanik oqaloqateqartarsimavoq, niviarsiaqqamik bussinut qaniuisimalluni inersimasullu aalakoorlutik aputit maligaasiornerinut uppissimasut nikuisittarsimallugit.
- Arlaatigut iluaqutaallunga misigisimavunga. Inuiaqatigiinnut innuttaaqatinnullu tunniussaqaqqittarpunga, oqarpoq nangillunilu:
- Aammattaaq inunnit nersualaarneqartarneq. Tamanna kuultitulli naleqarpoq, Niels Nielsen tulluusimaarluni nuannaarlunilu oqarpoq.
Nalliuttorsiornermut atatillugu Unnuarissat arfininngornermi septembarip arfernani 2025-mi nal. aqqanerniit marlup tungaanut Nuuk Centerimi kaffisortitsinissamut qaaqqusipput. Tassani Unnuarissat naapissinnaavatit, suliaat pillugit paasisaqarnerusinnaallutit ataatsimoornermillu nalliuttorsiutiginneqataasinnaallutit.
