Sumiiffinni TV-liortartut nutaammik peqatigiiffittaalerput
- Ukiut marluk kingulliit aningaarsartuutinut missingersuutit saqqummiunneqarsimanngillat. Taamaammat peqatigiiffik pissarsiariuminaatsoq nukippassuarnik atuiffigereerlugu, aalajangersimavugut nammineq peqatigiiffimmik aallartitserusulluta, ilaasortalimmik, Nuuk TV-p siulersuisuini sulittaasoq Peter Frederik Lyberth oqarpoq.
STTK-p ingerlalluarsimanngineranut suna pissutaanersoq taassuma ima nassuiaatissaqarsoraa.
- Naluneqanngitsutut STTK siulittaasoqarpoq, Radioqarfimmik massakkut atorunnaarnikumik. STTK-milu siulersuisut ilai Radiomik ingerlatsinikut massakkut ingerlatsinatik. Taamaammat soorunami radionik ingerlatsiunnaarnikunik siulittaasuuffeqarluni immaqa nakerinnarsimanngilaq, Peter Frederik Lyberth oqarpoq.
STTK-mi siulittaasoq Knud Fleisher, oqarpoq, ukiuni marlunni missingersuutit sananeqarsimasut saqqummiunneqanngiinnarsimasulli.
- Pitsaanerusumik ingerlasimasinnaagaluarpugut, kisianni oqarsinnaanngilanga ingerlanerlussimalluta. Aningaasaqarniarnermut missingersuutit ukiuni marlunni kingullerni suliaralugit naammassereernikuupput, sulilu ataatsimeersuartoqanngimmat taakku saqqummiunneqarsimanatik, Knud Fleischer oqarpoq.
STTK unnugu ataatsimeersuartitsissaaq, Knud Fleischerillu oqaatigaa, ataatsimeersuarnissaq peqatigiiffiit marluk taakku STTK-mit anineranik pissuteqanngitsoq.
Peqatigiiffik nutaaq novembarip ulluisa 29-anni ataatsimeersuartitsissaaq, peqatigiiffiullu nutaap lokalradionik tv-qarfinnillu maanna ingerlatsisunit aqunneqarumaartoq, Peter Frederik Lyberthip oqaatigaa.