Sumiiffinni sinniisoqalernissaanut innuttaasut oqallissaarneqarput
Nunatsinni innuttaaqataasut qanoq ilillutik oqartussaaqataasutut misigitinneqarnissaat KANUKOKA-mi allaffisornikkut aqutsisoqatigiit oqallissaarutigilerpaat. Aaqqissuussaaneq-mik taallugu saqqummersittakkami ippassaq saqqummersumi tamanna allaaserineqarpoq.
Kommunerujussuit sisamat 2009-mi atuutilerpata, sumiiffinni sinniisut pilersinneqassapput, taakkulu ilusilersornissaannut innuttaasut sunniuteqaqataarusukkunik oqallinnermut maannangaaq peqataasariaqartut, Kommuneqarfiit Kattuffianni pisortaq Martha Labansen isumaqarpoq.
- Oqaaseq “Sumiiffinni sinniisoq” qanoq immersorneqarsinnaasava? Oqalliserineqarneratigut innuttaasut akornanni neriuutigaarput kissaatit erseqqinnerusut saqqummiunneqarumaartut, Martha Labansen tunngavilersuivoq.
Sinerissami taamatut sumiiffimmi sinniisut sulerissappat? Oqartussaaffiit suut pigissavaat? Qanoq suleriaaseqassappat? Apeqqutit tamakkuupput akissutissarserusutaat.
-Periarfissat assigiinngitsut erseqqinnerusumik saqqummiussimavagut oqallisissiatut pingaartillugit.
Kommunerujussuit pilersinneqarpata, ullumikkut kommuniusut qassiit kattunneqartussaanerani aalajangiunneqarnikuuvoq kommunalbestyrelseni ullumikkut atuuttuninngaanniit ataatsimik pinngitsoorani ilaasortaqassasoq. Sinnerilu qinigaaffimmi kommunini nutaani qinerneqartassallutik.
- Pingaartuuvoq nunaqarfinni siulersuisut saniatigut illoqarfinni kommunqarfiusimasuni massakkut siunissaq takorloorlugu oqartussaaffiit qanoq qaninnerusumik isumagineqassanersut eqqartorneqarnissaat. KANUKOKA-p pisortaa oqarpoq.
Inatsisartut sumiiffinni sinniisoqarnissaq marlunngorpat aalajangiiffigisassatut oqaluuserissavaat. Sunamita anguneqassasoq kattuffimmit neriuutigineqarpa?
- KANUKOKA-mit pingaartinneruarput massakkut tunngaviusumik oqallisigineqarnerani inatsisartuni aamma innuutaasuni oqallinnermik malitseqassasoq. Upernaamut inatsisiliornissamut taamaalilluni innuttaasut oqallinnerisigut takuneqarsinnaaleqqullugu innuttaasut tungaanninngaannit suut kissaatigineqarnersut.
Martha Labansen aamma kaammattuivoq sumiiffinni qinikkat najukkaminni oqallitsitseqataaqqullugit.
Kommuneqarfiit Kattuffiata KANUKOKA-p allaffissornikkut aqutsisoqatigiivinit oqallisissiaq nittartakkami www.kanukoka.gl-imi pineqarsinnaavoq. Kikkulluunniit aamma periarfissaqarput nittartagaq taanna atorlugu kommunerujussuanngornissaq pillugu isummersoqataanissamut.
