Assi: Jessen Amalie

Sumiiffiit allat 18-it qaqqanit sisoortoqarsinnaanera pillugu misissuiffigineqalersut

Karrat Kangerlua annertuumik misissuiffigineqareeraluartoq nunatsinni sumiiffiit allat 18-it qaqqanit sisoortoqarsinnaanera pillugu aarlerinartorsiorfiusut suli misissuiffigineqanngillat. Misissuinerit aasaru aallartinneqassapput ukiunillu pingasunik sivissussuseqassallutik.

Karrat Kangerluani 2017-imi juunip qaammataani qaqqap ilaata sisoornerata, tamatumalu kingunerisaanik tassaarsuaqarnerata alianartumik kinguneqartup kingorna, ajunaarnersuarmik allamik pisoqaqqinnissaa pinngitsoortikkumallugu misissuinerpassuit aallartinneqarput.

Kitaani sumiiffiit 18-it sisoortoqarsinnaaneranut aarlerinartorsiorfiusutut Danmarkimi Nunatsinnilu Ujarassiuutut misissuisoqarfimmit GEUS-imit nalilerneqarput. Namminersorlutik Oqartussat taama ilisimatitsipput.

Sumiiffinniillu 18-iusunit qaqqaqarfiit pingasut Karrat Kangerluaniipput, qaqqaniillu sisoortoqarsinnaanera allannguuteqanngitsumik ’annertoorujussuarmik’ aarlerinartorsiorfiusoq nalilerneqarpoq.  Sumiiffiilli pineqartut pillugit paasissutissat pisariaqartut GEUS-imit maannakkorpiaq pigineqanngillat.

- GEUS-ip paasissutissat pioreersut atorlugit, qaqqani 15-ini annertuumik aarlerinaatilinni, annertuumillu aarlerinaateqarsinnaasuni qaqqamit sisoortoqarsinnaanera nalilersinnaanngilaa, Naalakkersuisut taama ilisimatitsipput.

Kitaa tamakkerlugu misissuisoqassaaq

Qaqqaqarfiit sukumiinerusumik misissuiffigineqartussat amerlanersaat Qeqertarsuup Tunuaniipput Nuussuullu qanittuani, ilaatigut Saqqamit kilometerinik 25-70-inik ungasitsigisumi Ilulissaniillu kilometerinik 22-35-nik ungasitsigisumi.

Tamanna siusinnerusukkut qaqqanit sisoortoqarneranik eqqugaasimavoq, ilaatigut Paatuuni 2000-imi sisoortoqarneranik.

Sumiiffiit aarlerinaateqarfiusut sinneri qulingiluat Kitaani inissisimapput, taakku sisoortoqarsinnaaneranut ’annertuumik’ imaluunniit ’annertoorujussuarmik’ aarlerinaateqarfiusutut nalilerneqarlutik. Sumiiffiit misissuiffigineqartussat kujasinnersaat tassaavoq Qaarusuup Qaqqaa Nuummit kilometerinik 25-nik ungasitsigisumiittoq.

Sumiiffinni pineqartuni tamani qaqqat innaat ujarassiuut ornigullutik misissortussanngorpaat.

Tamatuma saniatigut immap naqqanik aamma itissutsinik ilisimasaqarneq pisariaqarpoq, inoqarfinnut qaqqaqarfiit qanittuaniittunut tassaarsuaqarsinnaaneranut ulorianartorsiorneq eqqorluartumik naliliiffigisinnaaniarlugu, Naalakkersuisut taama ilisimatitsipput.

Misissuinerit aasaru aallartinneqassapput pilersaarutillu malillugit ukiunik pingasunik sivisussuseqassallutik.

GEUS-ip pisortaanera, Flemming Getreuer, naapertorlugu sumiiffiit aarlerinaateqarfiunerpaasut siulliullugit misissuiffigineqassapput – qaqqat inaassaa ilaat tikikkuminaatsupilussuusinnaanerat apeqqutaatillugu.

Misissuinermut aningaasartuutissat 24 millionit koruunit missaanniissangatinneqarput, naalagaaffiullu Namminersorlutillu Oqartussat avillugit akilissavaat.

Danskit naalakkersuisui Karrat Kangerluani ajunaarnersuaqarneranut atatillugu misissuinermut maanna naammassineqaqqammersumut 10 millionit koruuninik aningaasaliissuteqarput.

Sumiiffiit misissuiffigineqartussat allat 18-it ingerlaqqiffissaq una atorlugu imaluunniit assitaliussami ataaniittumi annertunerusumik paasisaqarsinnaavutit.

 

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat