Sumiginnakkat sullinneqarnerat pitsaanerusoq
Meeqqat sumiginnagaasartut pillugit suliniuteqarnissaq ukiuni tulliuttuni tallimaniit qulinut pilersaarusiorluarneqartariaqartoq, Demokraatininngaanneersoq Per Berthelsen oqarpoq.
Meeqqat sumiginnakkat pillugit Nunatsinni suliniarnerusoqarnissaa, siunnerfeqarnerunissarlu, Demokraatininngaanneersoq Per Berthelsen, aviisimut Danmarkimi saqqummersartumut Kristeligt Dagbladimut oqarpoq.
Tarnit pissusiinik ilisimasalik Kirsten Ørgaard Kalaallit Nunaanni Sulisitsisut Peqatigiiffianni atorfilik misissuisuuvoq, taassumalu politiit 2002-mi 2003-milu ulloq unnuarlu nalunaarutaat misissorsimavai.
Misissuinerup takutippaa meeqqat ukioqanngitsuniit 17-it tikillugit ukiullit 2002-mi politiinut nalunaarutigineqartartunut ilaasut 1033-inik amerlatigisimasut agguaqatigiisillugu ullormut pingasuusarlutik. Taakkunannga meeqqat pinerliisimasut pinerluffigitittulluunniit 601-iusimallutik.
2003-mi meeqqat pinerliisimasut pinerliffigitittulluunniit 726-iusimapput, tassa agguaqatigiisillugu ullormut meeqqat sisamat politiit nalunaarutaanni ilaasarlutik.
Meeqqat sumiginnakkat salliutinneqarnerunissaat pillugu, Kattuffiit politikerillu namminersornerullutik oqartussanut piumasaqarnerusariaqartut Majip qaammataani Red Barnet oqarpoq. Meeqqat sumiginnakkat pillugit nalunaarusiaq, Danmarkimi Red Barnet-mit FN-ip meeqqat pillugit immikkoortortaqarfianut nassiunneqarpoq, tassanilu nalilerneqassaaq, meeqqat pisinnaatitaaffii Nunatsinni Namminersornerullutik Oqartussat eqquutsinneraat.
Siumut sinnerlugit Folketingimut ilaasortaq Lars-Emil Johansen tallimanngormat radioaviisimut tamanna pillugu oqarpoq, kikkut tamarmik suleqataanissaat pisariaqartoq, minnerunngitsumillu immikkut suliniummik aallartitsisoqarlunilu naalagaaffimmit tapiissutaasartut saniatigut aningaasaliissuteqartoqaqqittariaqartoq.
Kuupik Kleist Inuit Ataqatigiinneersoq maajip naalernerani oqaaseqarnermini oqarpoq, ajornartorsiutit Kalaallit Nunaata iluani aaqqinniagassaasut, allallu akuliuttariaqanngitsut.
- Meeqqat atugaat pillugit, ukiuni kingullerni arlaqalersuni inatsisartuni oqallittarsimaqaagut. Meeqqat sumiginnakkat pillugit aningaasanut inatsisissanut 2006-mut aningaasanik immikkortitsisimavugut. Meeqqat sumiginnakkat pillugit suliassat, nammineerluta akisussaaffigaagut, Kuupik Kleist maajip naanerani oqarpoq. Isimaginninnermut Naalakkersuisoq Tommy Marø, maajip naanerani neriorsuivoq, meeqqat sumiginnakkat pillugit suliniarnissamut aningaasanik amerlanerusunik ujarlertoqassasoq.
