Sumiginnakkat inatsisartuni

Meeqqat inuusuttuaqqallu angerlarsimaffiup avataanut anissinneqartarnerat Inatsisartuni ullumi oqaaluuserineqassaaq. Meeqqanik pinngitsaaliissummik arsaarinnittarnermut atatillugu inissiivissaqartitsinerup inatsisitigut aalajangersaaffigineqarnissaa, Demokraatit sinnerlugit Inatsisartuni ilaasortap Astrid Fleischer Rex-ip siunnersuutigaa. Siunnersuut Inatsisartuni ullumi aappassaaneerneqassaaq.

 Meeqqat inuusuttuaqqallu angerlarsimaffiup avataanut inissinneqarneranni inissiivissaqartitsinerup inatsisitigut piumasaqaatinngornissaanik, Astrid Fleischer Rex-ip siunnersuutaa Inatsisartut Ilaqutariinnermut Peqqissutsimullu Ataatsimiititaliaani suliarineqareerluni ullumi aappassaaneerneqassaaq.

- Allamik aqqutissaqartoqartinnagu kommunit pinngitsaaliissummik arsaarinninnissamik toqqaassatillugit aningaasanut tunngatillugu isumalitersuutit apeqqutillu aalajangiisuusariaqanngillat, akerlianilli isumaginninnikkut oqartussat arsaarinninnissaq pisariaqartoq aalajangerpassuk, inissinneqartut inissaqartinneqarnissaat inatsisitigut qulakkeerlugu piumasaqaatinngortariaqarpoq, Demokraatineersoq Astrid Fleischer Rex siunnersuuteqarnermini taama tunngavilersuuteqarpoq.

Astrid Fleischer Rex-illi siunnersuutaa Naalakkersuisunit ilalernartinneqanngilaq. Naalakkersuisut akissuteqarnerminni erseqqissaatigaat meeqqanik angerlarsimaffiup avataanut inissiinermi kommuneqarfinni Isumaginninnermut Ataatsimiititaliat aalajangiisussaasut, inissiivissanullu tunngatillugu kommuneqarfiit akisussaasuusut.

-Inissiivissat inatsisitigut qulakkeerneqarnerata kingunerluutigisinnaavaa, ingerlaannartumik inissiinissamik piumasaqaatip naammassineqanngineratigut pillaasariaqalernissaq, pillarneqarnissarlu pinngitsoorniarlugu piaartumik arsaarinninnissamik kinguartitsisarlernerit. Pissutsit tamakku meeqqat peqqissussiinut iluaqutaanavianngillat, Naalakkersuisut tunngavilersorput. Tamatuma saniatigut meeqqanut ulloq unnuarlu inissiisarfiit pioreersut saniatigut 32-nik nutaanik inissaqartitsilernissaq pillugu Naalakkersuisut pilersaarutaat Inatsisartut ataatsimiinnerani matumani saqqummiunneqassasoq erseqqissaatigineqarpoq.

 Astrid Fleischer Rex-ip siunnersuutaa aappassaaneerneqannginnermini Ilaqutariinnermut Ataatsimiititaliamit isummerfigineqarpoq. Ataatsimiititaliallu isumalitissiissutaa Inatsisartunit oqaluuserineqassaaq. Ataatsimiititaliami Atassut Demokraatillu sinnerlugit ilaasortaasut marluk isumaqarput siunnersuut akuersaarneqartariaqartoq. Siumut Inuit Ataqatigiillu sinnerlugit ilaasortat pingasut isumaqarlutik siunnersuut itigartinneqassasoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat