Sumiginnagaaneq pillugu Katuami oqalugiartoqassaaq

Allattoq Carla Davidsen
juunip 13-at 2005 06:34

”Sumiginnaaneq kikkut tamarmik akisussaaffigaat” taama qulequtalimmik kulturikkut illorsuarmi Katuami ullaap tungaani nalunaaqutaq qulingiluaniit ulloqeqqanut oqalugiartoqassaaq. Oqalugiartussaq tassaavoq norskeq arnaq tusaamasaq Norsk Intitutimeersoq inuiaqatigiilerinermillu ilinniarsimasoq Kari Killén.

Kari Killén 1998-imi doktorinngorpoq, allaaseralugit sumiginnaasarneq meeqqanillu naalliutsitsinermut tunngasut. Meeqqanik inuusuttuaqqanillu eqqarsartaatsimikkut napparsimasunik katsorsaanermik USA-mi Tuluit Nunaannilu ilinniaqqissimavoq, taamatuttaaq inersimasunik tarnimikkut napparsimasunik katsorsaasarsimavoq, atuakkallu arfineq-marluk saqqummersissimallugit.

Tamanut ammasumik ullaap tungaani oqalugiarnissaanut Meeqqat Illuat aamma meeqqanut inuusuttuaqqanullu suliniut Mælkebøtten aaqqissuisuupput.