Sumiginnaaneq akiorniarlugu pikkorissaanerit ingerlalluartut
Meeqqanik sumiginnaasarnerit kinguaassiuutitigullu atornerluisarnerit akiorniarlugit paasititsiniaaneq Ilaqutariinnermut Pisortaqarfimmit, kommuninit politiinillu suleqatigiilluni ingerlanneqartoq siorna septembarimi aallartinneqarsimasoq suli ingerlalluartoq, ukioq manna oktobari tikillugu ingerlanneqassaaq.
Sisimiuni inunnik isumaginninnermik suliaqartut sapaatip-akunnerani uani pikkorissarneqassapput.
Pikkorissaanerni oqaatsip sumiginnaanerup imaa sumullu tunngatinneqarsinnaanera itisilerneqartarpoq, suliffeqarfiillu inunnik sullissiviusut suleqatigiissinneqartariaqarnerisa pingaarutaat sammineqartarluni.
Pikkorissaanernut atatillugu periarfissaqaraangat Ilaqutariinnermut Naalakkersuisoq innuttaasunik ataatsimiititsisarpoq.
Tunumi qaammatip tulliani juunimi, Qaanaami aggustimi, kujataanilu ukiaru paasisitsiniaasoqassaaq.
Nunaqarfimmiut pikkorissaanernut ilaasarput, maannamullu 502-t pikkorissaqataasimapput inuillu 380-t innuttaasunik ataatsimiititsinernut peqataasimallutik.
