Sumi inunngorsimaneq naapertorlugu akissarsiaqartitsineruvoq
Sumi inunngorsimaneq naapertorlugu akissarsiaqartitsinermit, suliariniakkani annertuuni nunat allamiunut Naalakkersuisut akissaatikitsitsinnerunissaat akerliusunit assersuusiunneqarluni isummerfigineqaqqammerpoq.
Tamannali Aatsitassaqarnermut Naalakkersuisup, Ove Karl Berthelsenip killormorluinnaq isumaqarfigaa.
- Aningaaasarsiat pisortatigoortumik minnerpaaffissaat qaffasissut tusaqqaarlugit pilerinarsinnaagaluarput, pissusiviusutigulli tamanna isumaqassaaq sumi inunngorsimaneq naapertorlugu aningaasarsiaqartitsinerup eqquteqqinneranik, sulisartut nunani allamiut kalaallinit sulisinnaasunit aningaasarsiaqarnerunissaat inatsisitigut qulakkeerneqassalluni, taama Aatsitassaqarnermut Naalakkersuisoq Ove Karl Berthelsen allappoq.
Taassuma taamatut tunngavilersuuteqarnermini aallaavigaa, assersuutigalugu Kinami inuuniarneq maani Nunatsinnut naleqqiullugu akikinneroreeqimmat, Kinamiut akissarsiaat Nunatsinni sulisartut akissarsiaannut naleqqiullugit annertunerusutut isikkoqassammata, taamaalillutillu Kinamiut aningaasanik atuisinnaaneri aamma akissarsiaasa pisissutaasinnaaneri annertunerulissallutik.
Ove Karl Berthelsenip taama oqarnermini assersuuppaa, qallunaat qanga tikisitat kalaallinit aningaasarsiaqqortunerusarnerinut.
- Taamaattumik ILO-mi isumaqatigiissut tigummiarlugu, suliartorlutik tikittut Kalaallit Nunaanni inuussutissarsiutini sulisunik qaffasinnerusunik suli aningaasaqartitaajuarnissaat piumasaqaatigissanerlutigu imaluunniit aningaasaliisartut namminersortut avataaneersut, aningaasaqarnermik ineriartortitsilersinnaasut pileritsatsinniarlugit atugassarititaasut eqqortut pilersissanerlugit aalajangiiffigisariaqarparput, Ove Karl Berthelsen allappoq.
Taamatut nalunaaruteqarnera parteeqataata, Naaja Nathanielsenip aalajangiiffigisassatut siunnersuutaanut marlunnut akissutaavoq.
Taassuma siullertut piumasaraa, sutigut tamatigut sulinermut immikkut piumasaqaatit, Nunatsinni atuuttussat, ILO-mi isumaqatigiissummi ilaareersimanngippata ilanngunnissaat qulakkeerneqassasut. Pisortat sanaartornikkut suliariniagaanni nunanit allanit tikisinneqarlutik suliartortinneqartut nunaqavissut aningaasarsiaattut aningaasarsiaqarnissaat isumaqatigiissummi tassani isumannaarniarneqarpoq.
Namminersortulli annertuumik suliaqarniartillugit aamma ILO-mi isumaqatigiissutip atuutsinneqartarnissaa Naaja Nathanielsenip piumasaralugu.
Ove Karl Berthelsen akissuteqaammini allappoq, Naalakkersuisut isumaat naapertorlugu, Kalaallit Nunaat ILO-mi isumaqatigiissummut ilanngunneqarnikuunngitsoq. Suliariniakkanullu annertuunut atatillugu taamatut piumasaqaateqarnissaq naapertuutinngilluinnartuussasoq isumaqarluni.
Ove Karl Berthelsenip ilanngullugu oqaatigaa, Kalaallit Nunaat ILO-mi isumaqatigiissummut ilaatinneqarnersoq Danmarkimi Sulisoqarneq pillugu ministeeriaqarfiup aamma Nunanut allanut tunngasunut ministeeriaqarfiup nalornisigigaat. Tamannalu aatsaat qulakkeerneqareerpat isumaqatigiissut Kalaallit Nunaanni atuutsinneqassanersoq Naalakkersuisut isummerfigisinnaagaat.
