Sumemut bilitsit nungupput

Nipilersoqatigiit Sume Københavnimi Illu Atlantikumi apriilip 29-ani 30-annilu tusarnaartitsinissaannut bilitsit tamarmik nungoreersut Illu Atlantikup nittartagaani atuarneqarsinnaavoq.

Rockimik nipilersortartut taakku ukiuni 40-ni nipilersortartooreersut aallartinnermisuulli maanna suli taama nuannarineqartigaat, alutorineqartuaannarlutillu.

Soorlu pisimasuinnik tunngavilimmik filmiliaq takkutingajalerpoq, Inuk Silis Høegh-mit Emile Péronardimillu suliaasoq.

Nipilersoqatigiit nuussualiaat siulliit marluk cd-liarineqaqqammerput, aatsaat cd-nngortitsisoqarluni. Sumekkullu oqaluttuassartaat Per Berthelsenip atuakkiarereerpaa, atuagaq decembarimi saqqummersoq, ateqartorlu Sumé - kalaallit rockertarnermikkut tusaamasarsuit oqaluttuassartaat.
Sumekkut Danmarkimi Sorømi 1972-imi nipilersoqatigiittalerput, ukiut tallimat qaangiummata avissaaraluarlutik, 1988-imili kattuteqqipput.

Nipilersoqatigiit 60-it missaannik maanna ukioqarput, sulili tassa nipilersoqatigiittarlutik.